Part 2

Et de Caldaie & Scalmaie vient le flo de nordest et le jussant de suest. Entre Scalmaie et Gras Hormes vient le flo de su, et le jussant de nort. Et de Gras Hormes par tout le costé jusques a Houlyhet vient le flo de su et le jussant a l’encontre et dehors en la route prent du nordest et du suruoest.

Et Houlyhet jusques a l’isle de Man vient le flo de suruoest, et le jussant vient de nordest. Et le long de l’isle de Man jusques dehors vient le flo de suruoest et le jussant a l’encontre.

Entre l’isle de Man et Escosse vient le flo de l’oest, et le costé d’Escosse jusques es mons de Galuay vient le flo de l’oest nordest et le jussant de l’oest nordest. De meurs de Galuay jusques a la pointe de Loquesten vient le flo de nort noruoest et le jussant a l’encontre, et de celle pointe jusques a Tare vient le flo de suruoest et le jussant de nort nordest.

Routes de Surlingues et de Angleterre jusques en Hirlande tout le long de la coste et quantes lieues a de l’un a l’autre.

Surlingues & cap de Clare gisent est suest & uoest nordest, et y a entre eulx .l. lieues. Cap de Cornouaille et cap de Veil gisent nornoest et suest ung quart de l’est et de uoest, et y a entre eulx trente & trois lieues. Cap de Veil et cap de Clare gisent est nordest et uoest suruoest, et y a entre eulx .xiiii. lieues. Cap de Clare et Musenes gisent est et uoest, et y a entre eulx .vii. lieues. Musenes et Dulfaie gisent est suest et uoest noruoest et y a entre eulx .vii. lieues. Dulfaie et la sonde de Blasquaye gisent nort & su ung quart de nort noest et de suest, et te garde des Aguillons, et y a entre eulx .xviii. lieues. Blasquaye & les isles Dareu gisent nort nordest & su suruoest et y a entre eulx .xviii. lieues. Blasquaye et Blacroc gisent nort et su, et y a entre eulx quarante lieues.

Du Blacroc sigle la vie de nort tu iras hors de toute hirlande.

Du Blacroc au Cantier il y a .vi. veues.

Cours du cap de Veil jusques au Cantier et comment les marees devers Hirlande portent.

Du cap de Veil jusques aux isles de Saltaye vient le flo de suruoest et prent de l’oest, et dehors en la route vient le flo de l’oest suruoest et le jussant de l’est nordest. Et de Saltaye jusques a Uquelo vient le flo de suruoest, et le jussant a l’encontre. Et de Uquelo jusques a Lambaye vient le flo du nort, et le jussant vient de su. Et de l’isle de Lambaye par tout le costé vient le flo de su suest, et le jussant a l’encontre. Et de Malines jusques a la poincte Darglas vient le flo de su surnoest, et le jussant a l’encontre. Et de la poincte Darglas jusques au Cantier vient le flo de nort nornoest, et le jussant de su suest.

Routes de boucqueau de Bayonne de long de la coste de Gascoigne jusques au ras de Sain.

Qui veult aller du boucqueau de Bayonne du long de la coste en Gironde voise sur le nort ung quart de noruoest pour doubler Alcassone, et puys quant tu auras doublé Alcassone va sur le nort ung quart de nordest, et iras aux Asnes. Au pertuis d’Antioche va sur le noruoest. Le pertuis d’Antioche gist uoest suruoest & est nordest: partez de Sainct Martin vostre droit cours est aller par le pertuis aux Bretons o uoest noruoest, et iras hors de l’isle Dieux.

Le pertuis aux Bretons gist est suest & uoest noruoest.

L’isle Dieux et Belisle gisent noruoest et suest. Et de Belisle a Glenan l’on doit aller a l’oest noruoest pour doubler la Jument de Glenan, et iras assez hors de Penmarch. Groye & Glenan gisent est & uoest ung quart de noruoest et de suest. Et qui veult aller par dehors Roche Blanche prenne le plus du uoest. Et pour donner garde de Roche Blanche prenez bons amers oultre Sainct Nicolas hors de Penfret et vous n’aurez doubte de Roche Blanche. Et quant vous serez dedens Glenan laissez les deux pars devers l’isle de Moncons et la tierce partie devers Glenan, et allez o uoest par le coureu. L’isle de Moncons et Sainct Nicolas gisent nort et su. La route de Glenant gist est et uoest. Partez de la route de Glenan et courez uoest & noruoest si viendrez devant Sainct Tud. Et qui part de la route de Glenan et veult doubler Penmarch son cours est o uoest ung quart de suruoest: car la route de Glenan & la Fourcque gisent est & uoest. Penmarch et Fontenault gisent noruoest et suest.

Les veues de la Rochelle jusques en Flandres.

De la Palice au Balivers y a .vii. lieues, de Balivers a Holonne .vii. lieues, de Holonne a l’isle Dieux .vii. lieues, de l’isle Dieux a Belisle .xx. lieues, de Belisle a Groie .vii. lieues, de Groie a Glenan .vii. lieues, de Glenan a Penmarch .vii. lieues, de Penmarch au ras .ix. lieues, du ras a Sainct Mahé .ix. lieues, de Sainct Mahé au Four .vii. lieues, du Four a Bergroach .vii. lieues, de Bergroach a l’isle de Bazpaoul y a quatorze lieues, de l’isle de Bazpaoul jusques a Sept Isles il y a sept lieues, de Sept Isles a Brehat .vii. lieues, de Brehat a Freelle .x. lieues, de Frellee a Sainct Malo .iiii. lieues, de Sainct Malo a Chanssaie .vi. lieues, de Chanssaie a Jarsaye .vii. lieues, de Jarsaye a la Hague .viii. lieues, de la Hague a l’isle Deuich .xxviii. lieues, de l’isle Deuich a Calais .xlii. lieues, de Calais à l’Escluse .xxi. lieues.

Ce sont les sondes, venant d’Espaigne de la part dehors les isles ou chemin du nort & dessus la Rochelle.

Saches que en cest paraige es .l. brasses tu seras a .xvii. lieues de la terre. Et si tu es a .xl. brasses tu seras a douze lieues de la terre. Et se tu es a trente brasses tu seras a .vii. lieues de la terre. Et se tu es a vingt & quatre brasses tu seras a .iiii. lieues & en ceste route trouveras vase & seras devers Maumusson et pres de la terre, et trouveras pierres comme pois et sçaches que tu seras devers le Balivers ou devers Holonne & n’aprouche point se tu n’y es de jour en ceste sonde de .xxv. brasses et se tu es o su de l’isle Dieux a .lx. brasses tu trouveras sablon menu & seras a .xiiii. lieues de la terre. Se tu es a .l. tu seras a dix lieues de la terre.

Saches que de .xxx. brasses tu verras l’isle de Faic cler. Saches que se tu es en la mer de Laire es .lx. brasses tu trouveras vase tant que tu soyes a .xxv. brasses.

Saches que o su de Belisle a .lx. brasses tu seras a .x. lieues de l’isle & n’aproche plus que a .l. ou .xl. brasses, se tu n’y es de jour. Car saches que en la route de Belisle le Glenan a cinquante brasses tu seras bien pres de la terre: et vous gardés, car il y a faulses sondes en travers de Glenan et de Penmarch.

Comment les terres de Bretaigne et d’Espaigne gisent et quantes lieues a de l’un a l’autre.

La basse Frede et Cap gisent nort nordest et su suruoest. Pellen Penmarch et Sissergues gisent nornoest et suruoest ung quart de su, et de nort, et il y a entre eulx .xvi. veues. Glenan & aussi Sainct Vincent de la Bacquere gisent nort & su & y a entre eulx .iiii.xx.v. lieues. Groye et Sainct André gisent nort & su et y a entre eulx .iiii.xx.v. lieues. Belisle et Laredou gisent nort et su et a entre eulx .lxviii. lieues. L’isle Dieux & Martichaco gisent nort & su & a entre eulx .xlii. lieues. La Hollonne et Sainct Sebastien gisent nort et su.

Les lieues du boucqueau de Gironde jusques au boucqueau de Bayonne le long de la coste d’Espaigne et de Portingal.

Du boucqueau de Gironde jusques au boucqueau de Bayonne il a vingt et cinq lieues.

De Bayonne a Fonterabie .viii. lieues, de Fonterabie a Sainct Sebastien .iii. lieues, de Sainct Sebastien a Quitaire .iii. lieues, de Quitaire a Montrigo .iii. lieues, de Montrigo a Vermeo .v. lieues, de Vermeo a Bilbau .vi. lieues, de Bilbau a Castres .iiii. lieues, de Castres a la Radde .iii. lieues, de la Radde a Sainct André .vi. lieues, de Sainct André a Sainct Martin .v. lieues, de Sainct Martin a Sainct Vinceut de la Barquere cinq lieues, de Sainct Vincent a Lagues .v. lieues, de Lagues a Ribedecelle .v. lieues, de Ribedecelle a ville Vicieusse .v. lieues, de Vicieusse a Gignon .iiii. lieues, de Gignon a Pennes de Gonson .ii. lieues, de Gonson a Veilles .ii. lieues, de Veilles a Pronne .ii. lieues, de Pronne a Lienarque .ix. lieues, de Lienarque a Ribedaine .v. lieues, de Ribedaine a Sainct Fabien .v. lieues, de Sainct Fabien a Umero .ii. lieues, de Umero a cap de Vere .ii. lieues, de cap de Vere a Ortiguer .ii. lieues, de Ortiguer a Sidera .iiii. lieues, de Sidera a cap de Prioul .iiii. lieues, de cap de Prioul a la Couloigne .iii. lieues, de la Couloigne a Sissergues .v. lieues, de Sissergues a Cormes .iiii. lieues, de Cormes a Mongie .v. lieues, de Mongie au cap de Fine terre .iiii. lieues, du cap a Cea .v. lieues, de Cea a Mores cinq lieues, de Mores a Bayonne de Moror .viii. lieues, de Bayonne a Camino .iiii. lieues, de Camino a Vienne .iiii. lieues, de Vienne a la ville de Conte .v. lieues, de la ville de Conte a Porte en Portingal y a quatre lieues, de Porto Vero de Montego neuf lieues, de Mondego a Parades neuf lieues, de Parades a Berlingues neuf lieues, de Berlingues a Rocque de Cintre .xii. lieues, de Rocque de Cintre au cap de Ficher .x. lieues, de cap de Ficher au cap de Saint Vincent il y a vingt et huyt lieues, de cap de Sainct Vincent au cap de Saincte Marie .xviii. lieues, entre cap de Saincte Marie et l’abbaye d’Olues a .xviii. lieues, entre l’abbaye d’Olues et Sainct Lucas de Baremado .xiii. lieues.

Routes de Ponteau de Feron jusques au fleuve Jourdain, et quantes lieues a de l’un a l’autre.

Ponteau de Feron et l’isle de Calix gisent est et uoest, et y a entre eulx vingt lieues.

L’isle de Calix et Trefalgar gisent est suest et uoest & nornoest & y a entre eulx .viii. lieues.

Trefalgar & le destrois de Maroc gisent est et uoest ung quart de suest et de noruoest, et a entre eux .xii. lieues.

L’estrois de Maroc et cap de Gatte gisent est et uoest ung quart de nordest et de suruoest et y a de l’un a l’autre .lxv. lieues.

Cap de Gatte et les Formingues gisent nordest et suruoest et a entre eulx .lx. lieues.

Les Formingues et Maillorgues gisent nordest & suruoest et a entre eulx .xxx. lieues.

L’isle de Maillorgues a de long .xxxviii. lieues.

Maillorgues et Sardaine gisent est et uoest et y a entre eulx .xc. lieues.

Sardaine & Fozille gisent est et uoest quart de suest et ung quart de noruoest, et a entre eulx .xxii. lieues.

L’isle de Fozille a de longueur environ .lxii. lieues.

L’isle de Cecille et l’isle de Sapience gisent est et uoest, et a entre eulx .xii. lieues.

L’isle de Sapience et l’isle de Candre gisent est et uoest ung quart de suest et ung quart de noruoest, et a entre eulx .lxii. lieues.

L’isle de Candre a de long .lii. lieues.

L’isle de Candre et l’isle de Famagosse gisent est et uoest, et y a entre eulx .cxv. lieues.

L’isle de Famagosse a de longueur .c. lieues.

L’isle de Famagosse et cap de Cinaco gisent est et uoest.

Cap de Dionaco et fleuve de Jourdain gisent nort & su, et y a entre eulx .xc. lieues.

Qui veult bien compter la lune par les heures l’on doit prendre pour chascun quart de lune .xxii. heures et demie.

Item pour deux quars .xlv. heures. Item pour trois quars .lxvii. heures et demie. Item pour quatre quars quatre vingts dix heures.

Notat ung run de vant soleil o su lune o suest.

Item pour cinq quars il y a .cxii. heures & demie. Item pour .vi. quars .cxxxv. heures. Item pour sept quars .xlvii. heures & demie. Item pour huyt quars cent quatre vingts heures.

Deux run de vant soleil o uoest lune o su.

Item pour neuf quars deux cens .ii. heures. Item pour .x. quars .cc.xxv. heures. Item pour onze quars .cc.xlvii. heures et demie. Item pour douze quars deux cens .lxx. heures.

Trois run de vant soleil o su lune o nordest.

Item pour .xiii. quars .cc. quatre vingts .xii. heures et demie. Item pour quatorze quars .ccc.xv. heures. Item pour quinze quars .ccc.xxxviii. heures et demie. Item pour seize quars .ccc. soixante heures.

Quatre run de vant soleil o su lune o nort.

Et sic de aliis. Note bien et ainsi trouveras en une lune sept cens et vingt heures.

Qui veult bien compter la lune par les jours l’on doit prendre pour chascun quart de la lune trois quars et demy quart de jour une heure et demie.

Item pour deux quars il y a ung jour et .iii. quars et demy quart de jour.

Item a trois quars y a deux jours .iii. quars une heure et demie.

Item a quatre quars il y a trois jours & trois quars de jour.

Item pour cinq quars il y a quattre jours et demy quatre heures et demie.

Item pour six quars il y a cinq jours et demy et demy quart.

Item pour sept quars il y a six jours et demy et une heure et demie.

Item pour huit quars il y a sept jours & demi.

Nota .ii. run de vant.

Item pour neuf quars et demi quart une heure et demie.

Item pour dix quars neuf jours et neuf heures et demie.

Item pour .xi. quars dix jours et sept heures et demie.

Item pour douze quars onze jours et quart de jour.

Trois run de vant.

Item pour .xiii. quars .xii. jours quattre heures et demie.

Item pour .xiiii. quars il y a treize jours, et demi quart.

Item pour quinze quars il y a .xii. jours heure et demie.

Item pour .xvi. quars y a .xv. jours et non plus. Ainsi ne trouveras que trente jours a chascune lune.

Nota bene

A .xviii. jours et a .xviii. heures la lune le soleil o su que maree fera a Glenan? la response: Il sera basse mer et la lune sera o noruoest et aura trois vens entre la lune ou le soleil.

Ce sont les noblesses et coustumes aux contes de Bretaigne

Premierement toutes nefz ou vaisseaulx quant ils adventurent a la costiere de Bretaigne tout est conquis ausditz contes sans que nul homme ne marchant y prennent rien sinon ceulx qui les saulvent qui doivent avoir leur salaire selon qu’ilz ont desservi, c’est assavoir s’ilz vont a l’aventure de la mer loing les querre ilz ont le tiers et s’ilz ne perdent terre ilz n’auront que salaire competant au regard de justice. Et pource que le païs de Bretaigne est de si grant dangier que a peine par deux ans peult nef mareer sans venir en dangier de la dicte seigneurie dont fut accordé entre ledit conte & toutes manieres de nefz par l’assentement du treschrestien roy de France a la priere, requeste, et supplication de trestous les païs que ledit conte mist seaulx lesquelz sont appellez brefz esquels qu’il vousist en son terrouer et ainsi estoient tenues toutes les nefz qui chargeoient a la duché de Bretaigne jusques au royaulme d’Espaigne de prendre lesditz brefz sur peine de ladicte nef perdre et tous les biens. Fut accordé pource entre lesditz nommez a quelque nef qui se aventurast a sondit terrouer trouvant les brefz en tesmoignage du papier des lieux ou les brefz seroient ne doibt ladicte seigneurie rien prendre ne souffrir que l’en prenne rien de ladicte nef des biens qui dedens soyent ne de la marchandise saulve le droit des saulveurs lequel est accordé affin qu’ilz travaillent a saulver les biens. Et pour ces convenances des brefz sont asseurees toutes manieres de nefz et marchandises du droit et noblesse du dit prince. Et doivent monstrer a l’admiral ou son lieutenant les brefz de tous les voyages qu’ilz auront fait en une annee toutes fois qu’il les vouldra requerre, ou autrement il le peult tenir en poefait. Et pource que le roy d’Espaigne ne ses pors ne furent mie dessoubz ceste acordance a mareer soubz la premiere condition ne aussi les anglois ou cas qu’ils viendroient chargees ou vuidees de leur païs, mais s’ilz chargeoient ou les brefz sont, ils sont tenus d’en prendre: car s’ilz sont sans lesdictz brefz ils sont a la voulenté du prince corps et biens.

L’ordonnance pourquoy le viconte de Leon est acoustumé es seaulx lesquelz sont appellez seaulx de conduict non mie brefz fut pource que ledit vicomte estoit de trespas de la ou il convenoit a toutes nefz assembler chargees & vuides, affin que les ungz ne mesfissent aux aultres pource qu’ilz estoient d’estranges contrees il fut acordé que il devoit tenir vaisseaux pour les garder et conduire endroict sa terre & ledit trespas et pour souffrir que toutes manieres de gens puissent prendre vitaille a sondict terrouer fut pource accordé que il eust certaine somme pour les seaulx, et ou cas que aucune nef passeroit oulstre sans prendre vitaille a sondit terrouer sans avoir les seaulx elle auroit forfait en corps & en biens et pource ledict viconte les suivra quelque part qu’elles iront & les amenera avecques lui comme chose forfaicte a justicier a son terrouer dessusdict. Et sont tenus a monstrer tous les seaulx des voyages qu’ilz auront faictz pour annees, et par ainsi est tenu ledit viconte de tenir lesdictz vaisseaulx et faire son povoir de leur porter paix oudit trespas et en sondit terrouer, et c’est son droit depuis que homme a memore depuis que les seigneurs de Bretaigne ont conquis ladite viconté, et sont les deux noblesses audit prince. Et depuis que ladicte noblesse fut toute audit prince il a voulu que les espaignolz et aultres qu’ilz peussent prendre port en sa terre sans adventure chargee ou a charger d’estrange pays que la ou les brefz seront saufz a eulx demander les brefz dedens la tierce maree.

Apres avoir getté au port leur ancre en la terre, et saisir o effect les aller querir en quelque part qu’ilz seront ou cas qu’ilz ne passeroient par le ras de monseigneur Sainct Mahé, mais ou cas qu’ilz ne passeront, ilz ne seront mie sauvez par telle voulenté et maniere.

Cy commencent les jugemens de la mer des nefz, des maistres, des mariniers, et aussi des marchans et de tout leur estre.

Et premierement l’en fait ung homme maistre d’une nef, la nef est a plusieurs compaignons, la nef se part du pays dont elle est et vient a Bourdeaulx ou en aultre lieu & se frete a aller en pays estrange. Le maistre ne peult mie vendre la nef s’il n’a procuration ou mandement des seigneurs. Mais s’il a mestier d’argent pour les despens de la nef il peult mettre aucuns des appareilz en gaige par le conseil des mariniers de la nef. C’est le jugement en tel cas.

* * * * *

Une nef est a ung havre, et demoure pour attendre son fret et son temps, et quant il vient a soy departir le maistre doit prendre conseil a ses compaignons & leur dire. Seigneurs vous haite ce temps? Aucun y aura qui dira. Ce temps n’est mie bon, car il est nouvel devenu, et le devons laisser asseoir. Et les aultres diront: le temps est bel et bon. Le maistre est tenu foy accorder o le plus de ses compaignons, et s’il le faisoit aultrement et la nef se perdoit, il est tenu de rendre la nef ou la somme qu’elle seroit prisee s’il a dequoy. C’est de ce le jugement.

* * * * *

Item si une nef se pert en aucunes terres en quelque lieu que ce soit les mariniers sont tenus de sauver le plus que ilz pourront des biens de la nef et des denrees. Mais s’ilz aydent a les sauver le maistre est tenu de leur bailler leurs coustz raisonnablement a venir en leur terre. Et aussi s’ilz ont tant sauvé parquoy le maistre le puisse faire, et peult bien le maistre engaiger des choses qui seront sauvees a aucun preudhomme pour les avoir, et s’ilz n’aydent desdictes choses sauver, il n’est mie tenu a les pourveoir en riens, ainçois perdent leurs loyers quant la nef est perdue.

Et aussi ne peut le maistre vendre les appareilz de la nef s’il n’a mandement ou procuration des seigneurs, ainçois il les doit mettre a sauvegarde jusques a tant que il sache la voulenté des seigneurs, et le doit faire le plus loyallement qu’il pourra, et s’il faisoit aultrement il est tenu a le amender s’il a dequoy. C’est le jugement.

* * * * *

Item une nef se part de Bourdeaulx ou d’aultre part chargee, il advient aucunesfois que la nef s’empire, l’on sauve le plus que l’on peult des denrees. Les marchans & le maistre sont en grant debat & demandent les marchans a avoir du maistre leurs denrees, ils les doivent bien avoir payant le fret d’autant que la nef aura fait tel voyage lieue par lieue, cours par cours s’il plaist au maistre. Et se le maistre veult il peult adouber sa nef, et s’il est en cas qu’elle peust estre prestement adoubee, et sinon il peult louer une aultre nef a achever son voyage. Et aura le maistre son fret de tant comme il aura des denrees sauvees. Et doit le fret desdictes denrees qui sont sauvees estre conté tout livre a livre & les denrees a payer son advenant des coustz qui auroient esté mis esdites denrees sauver. Et se ainsi estoit que le maistre & les marchans promissent aux gens qui leur ayderoient a sauver la nef & lesdictes denrees la tierce partie ou la moitié desdictes denrees qui pourroient estre sauvees pour le peril ou ilz sont la justice du pays doit bien garder quelle peine & quel labeur ilz auront mis a les sauver, et selon celle peine non contenant celle promesse que lesdictz maistres et marchans leur auroient faicte les guerdonner. C’est le jugement.

* * * * *

Item une nef se part d’aucune part chargee ou vuide et est arrivee en aucune part, les mariniers ne doivent yssir sans le congié du maistre, car se la nef perdoit ou empiroit par aucune adventure ilz sont tenus a amender. Mais se la nef estoit en lieu ou elle estoit ancree de deux amarees ou de trois ilz pevent bien yssir sans le congié du maistre laissant une partie desditz mariniers a garder la nef & les denrees a eulx revenir par temps en leur nef & se ilz estoient en demeure ilz les doivent amender s’ilz ont parquoy. Et est tel le jugement.

* * * * *