XII.

BUH FOWL-HAWK AN BUH TUKREY BUZZUD.

Time bin berry harde. Bittle oncommon scace. Buh Fowl-hawk an Buh Tukrey Buzzud, dem bin a sail backwud and forrud in de element, duh look fuh see wuh dem kin pick up fur eat. Es dem pass one a nurruh, Buh Fowl-hawk, him ax Buh Tukrey Buzzud how him mek out. Buh Tukrey Buzzud mek answer dat eh yent mek out wut; dat half de time eh cant fine nuttne fuh eat; dat eh so hongry eh mos ready fuh perish; but dat eh mek up eh mine ter keep on guine, an ter wait on de Lord. Den eh quire ob Buh Fowl-hawk how him duh git long dis yer tight time. Buh Fowl-hawk, him switch eh tail, an eh say him smarte nough fuh git him libbin; dat him dont lack fuh bittle; dat Lord er no Lord, him manage fuh fine all him want fuh eat.

Wid dat dem part compny, an gone dem own couse.

Bimeby dem sail pass one anurrer gen, an Buh Fowl-hawk, him call to Buh Tukrey Buzzud, an him say: “Enty me bin tell you me hab no trouble fuh fine bittle wenebber me want um? You see dat black chicken down yander? Me guine ketch um now fuh me dinner.”

Wid dat, eh leff Buh Tukrey Buzzud, an eh mek eh lunge fuh kibber de chicken. Stidder eh bin one chicken, eh tun out fuh bin er sharp-pinted stump; an befo Buh Fowl-hawk fine out de diffunce, an kin check eh speed, eh hit eh bres gin de stump an kill ehself.

Two, tree day arter dat, Buh Tukrey Buzzud bin a sail ober de same groun, an eh cotch de scent er someting dead. Eh fole eh wing an eh come down. Wen eh come fuh fine out, eh see Buh Fowl-hawk duh led down dead. Den eh say: “Enty me bin tell you eh heap better ter wait on de Lord stidder trus ter you own luck? You wouldnt yeddy me, an you see wuh happne. Now me tun come, an you flesh guine ile me bade.” Wid dat, eh eat up Buh Fowl-hawk.

“De man wuh trus in ehself,” moralized Daddy Sandy, “guine fail; wile dem dat wait topper de Lord will hab perwision mek fur um.”