VI.

BUH TUKREY BUZZUD AN DE KING CRAB.

You notus Buh Tukrey Buzzud. Him lub lamb, an dead cow, an dead horse, an snake, an alligatur, an all kinder varmint. Eh berry lub dead fish too, but eh nebber bodder wid crab. You sabe huccom so? Lemme tell you.

One time one fisher-man bin come from fishin. Eh tek out de good fish, eh tring um on a mash grass, an eh lef in de boat some leely gannet-mullet an catfish wuh eh no want, an one big King Crab wuh eh bin ketch duh ribber. De sun hot. De fish done dead. Bimeby eh smell bad in de boat. Buh Tukrey Buzzud, wuh bin a grine salt way up in de element, scent um, an down eh come. Eh gone in de boat an eh eat up de fish wuh day day. Eh dat greedy eh duh hunt fuh mo. Eh see de King Crab duh squat een de water duh bottom er de boat. Eh tretch open eh wing fuh skade de Crab an mek um come outer de water. Buh Tukrey Buzzud faid water. Eh nebber will wet him foot ef eh kin help. De King Crab see de Buzzud, an eh crawl up long side de boat. Buh Tukrey Buzzud ben ober fuh pick um. De Crab graff Buh Tukrey Buzzud leg wid eh claw. Buh Tukrey Buzzud hop an kick. Eh couldnt mek de Crab leggo. De ting hot um berry bad. Buh Tukrey Buzzud rise wid de Crab duh heng on ter eh leg. Eh sail up in de element. De Crab stick ter um. Buh Tukrey Buzzud try ebry plan fuh shake um off. De Crab wunt loose eh grip. Buh Tukrey Buzzud tun summerset in de sky. Eh flap eh wing. Eh mek all sorter curous motion. Eh cant shake de Crab loose. Bimeby eh try fuh bite de Crab. All ob a sutten, de Crab tek eh tarruh claw, an eh fastne Buh Tukrey Buzzud roun eh neck. Yuh de big trouble now. One claw hole Buh Tukrey Buzzud foot; tarruh claw clamp Buh Tukrey Buzzud roun eh neck. De Bud duh choke. Eh gib up. Eh cant go no fudder. Eh dis leggo ebryting in de element, an eh fall heel ober head plash in de water. De minnit de King Crab fine isself in de ribber, eh loosne eh hole an eh gone der bottom. Buh Tukrey Buzzud mose drown. Eh fedder wet. Eh splutter, eh wabble, an arter awhile eh manage fuh ketch eh bref, an eh mount eh wing, an eh sail off teh one dead libe-oak tree, wuh grow on de bank, an eh set down day an eh pick eh fedder, an eh watch de blood duh drap from eh neck an leg, an eh say to isself: “Me nebber guine bodder long crab gen long as me lib.” An eh nebber did. You show King Crab to Buh Tukrey Buzzud, an eh’ll leff um. Eh yent guine nigh um. All eh fambly faid um.