LV.

DE FIDDLER, BUH TIGER, AN BUH BEAR.

Long time ago dere bin er Ebo man wuh bin er great fiddler. Eh know better den all dem tarruh people wuffer do long fiddle. Wen eh lean back, an shet eh yeye, an draw eh bow fuh tru, nobody wuh yeddy kin keep from shuffle eh foot. Ebry body roun de settlement blan gage um fuh mek de music fuh dem fuh dance. One day eh bin gwine fuh keep eh gagement fuh play at er party. Eh hab eh fiddle een er bag. Es eh bin der walk tru er deep swamp, Buh Tiger an Buh Bear tek eh track an run um. De man skaid wus den bad, but eh wunt drap eh fiddle. Eh clime one tree an fix ehself een one crotch. Fus ting eh know, Buh Tiger biggin fuh crawl up de tree fuh ketch um. De man holler and try fuh skaid de beas, but eh wunt skaid. Eh keep on duh clime up. Den de man draw eh fiddle an eh bow outer de bag, an biggin fuh play wid all eh strenk. Buh Tiger bleege fuh stop teh listne ter um. Een er leely wile de chune sweeten Buh Tiger so bad eh forgit ter foller de man, an eh tun roun an come down de tree, an him an Buh Bear graff han, an all two set een fuh dance. De faster de fiddler play, de faster dem dance. Dem gone roun an roun, up an down, tel dem dead tired. At lenk dem all two so outdone dem bleege fuh drap der groun an try fuh ketch dem win. Dem cant dance er foot furder, an dem duh try fuh keep de time long dem head.

Wen de Fiddler notus how complete dem outdone, eh slip down de tree, an tek eh foot een eh han, an lean fuh de place way eh bin gwine. Buh Tiger an Buh Bear yent hab strenk fuh foller um: an so eh music sabe um.