LVII.

BUH GOAT AN BUH WOLF.

Buh Goat berry faid tunder an lightnin an rain. One day big tunder storm rise een de wes, an eh rain, an eh lightnin, an eh hail. Buh Goat an eh wife bin er feed een de wood close by Buh Wolf house. Wen de lightnin flash, an de tunder roll, an de rain po down, dem faid fuh stay een de wood, an dem run teh Buh Wolf house, an dem bague um fuh leh dem come een tel de storm done ober. Buh Wolf tell dem yes; an eh tun Buh Goat an eh wife een de shedroom, an eh shet de do behine dem an latch um. Buh Wolf shedroom yent bin hab bode flo. Eh mek topper de neked dut. Arter Buh Wolf done shet up Buh Goat an eh wife, eh git eh fiddle an eh biggin fuh play an sing: “Tenky goolly God, tunder an lightnin done sen meat een me house. Tenky goolly God, tunder an lightnin done sen meat een me house.” Buh Goat wife yeddy wuh Buh Wolf bin er play an sing, an eh say teh eh husbun: “Enty you yeddy wuh Buh Wolf duh play an duh sing: ‘Tenky goolly God, tunder an lightnin done sen meat een me house’? Him gwine kill an eat we. Better leh we grabble out an leff.” All dis time Buh Wolf wife bin er tell eh husbun: “You better mine wuh you duh sing. You better keep you mout shet. Buh Goat an eh wife gwine yeddy wuh you duh say.” Buh Wolf wouldnt listen ter um. Eh wouldnt stop. Him say de rain duh fall so hebby Buh Goat an him wife couldnt mek out wuh him duh sing. Wile dis bin er gwine on, Buh Goat an eh wife busy duh grabble, grabble, grabble onder de sill er de shedroom tel dem mek hole big nough fuh dem fuh crawl out, an den dem slip out an gone.

Wen de rain stop, Buh Wolf heng up eh fiddle an gone git eh knife, an pit eh pot on de fire, en sharpen eh knife on de pot rim. Den eh onlatch de shedroom do an gone een fuh cut de troat er Buh Goat an eh wife. De fus ting eh fine out, Buh Goat an eh wife done gone. Eh holler back ter him wife an eh say: “Ole ooman! Buh Goat an eh wife git way.” De ole ooman--wuh bin Buh Wolf wife--mek answer: “Enty me bin tell you say Buh Goat an eh wife gwine yeddy? Duh you mek dat. Ef you bin do es me bin tell you, an keep you big mout shet, you bin hab um all two now.” Den Buh Wolf an eh wife biggin fuh quarrel an fight caze Buh Wolf skaid Buh Goat an eh wife an lem git way. Buh Wolf wife lick eh husbun tel eh holler, an eh tell um eh shant stay een de house bedout eh fine um een meat. Buh Wolf bague berry hard, an eh prommus say ef eh wife lem go him will hunt an fetch bittle right off. Den eh wife tun um loose, an Buh Wolf gone fuh git meat.

Een de arternoon er de same day, wile Buh Wolf bin er hunt bittle, eh meet up wid Buh Goat, an eh ax um: “Buh Goat, wuh sort er mean trick dat wuh you bin do me dis mornin?” Buh Goat, him bex, an him mek answer: “How you hab de face fuh talk long me an ax me sich er question? Enty you bin fix fuh kill me an me wife dis mornin arter you done gie we de freedom er you house? Enty we yeddy you sing an tenk de Lord case tunder an lightnin sen meat een you house? You hab er bad heart. You no duh frien.” Buh Wolf, him say: “You mek mistake. Me no bin gwine hot you. Me dist bin er fun.” Buh Goat answer: “Yes, you yiz bin mek up you mine fuh kill we. Haw Buck! me lub my life dist es much es you lub yourn, an me no want hab nuttne mo fuh do long you.” Wen Buh Wolf fine eh couldnt fool Buh Goat, eh change eh chune an eh say: “Go long, Boy. You git way one time, but narruh chance gwine come; an de nex time me git you een me power me yent gwine wait topper nuttne, but me gwine pick you bone right off.” Buh Goat laugh at um, an eh answer: “Now you done speak you mine, lemme tell you, you nebber gwine git narruh chance fuh ketch me. Me boun fuh watch you.” An so dem part company. Buh Goat nebber did trus Buh Wolf from dat day tel dis.