XIII.

BUH WOLF AN BUH RABBIT.

Buh Wolf and Buh Rabbit bin a cote de same Gal. De Gal bin rich an berry pooty. Dem tuk tun fuh wisit um. Buh Rabbit, him gone der mornin, and Buh Wolf, him gone der ebenin. De Gal harde fuh mek up eh mine. Eh sorter courage bofe er um. One mornin Buh Rabbit bin a mek fun er Buh Wolf ter de Gal, an eh tell um say Buh Wolf yent duh nuttne mo den eh farruh ridin horse.

Wen Buh Wolf pay him wisit de same ebenin, de Gal tell um wuh Buh Rabbit bin say bout um. De ting mek Buh Wolf bex, an eh say Buh Rabbit lie, an eh guine fetch Buh Rabbit ter de Gal an mek um tek back dat big wud befo eh face.

Buh Wolf leff de Gal an gone straight ter Buh Rabbit house. Buh Rabbit bin spicion say de Gal guine tell Buh Wolf wuh him bin say bout um; an eh know, wen Buh Wolf yeddy, dat eh boun fur tackle um bout um. So Buh Rabbit, him fix eh plan.

Wen Buh Wolf git ter Buh Rabbit house, eh fine um all shet up. Eh look same luk nobody bin day. Eh knock ter de do. Eh knock. Eh knock. No ansur. Eh gone ter de winder. Eh shake um. Nobody mek ansur. Den eh holler: “Buh Rabbit, Buh Rabbit!” Arter a while eh yeddy er leely woice eenside say: “Who dat?” Buh Wolf ansur: “Duh me, Buh Wolf.” Buh Rabbit say: “Wuh you want, Buh Wolf?” Buh Wolf, him say: “Lemme come in, Buh Rabbit; me bleege fuh see you on tickler bidness.” Buh Rabbit, him mek ansur: “Buh Wolf, me cant see you now; me berry sick; me day in me bed; me too weak fuh open de do.” Buh Wolf say: “Buh Rabbit, you mus lemme in: you de only man wuh kin ten ter de bidness wuh bring me yuh.” Buh Rabbit try fuh pit um off. Eh tell um eh hab high feber, an eh cant rise; dat eh back bin er hot um so bad eh cant tun in eh bed. But Buh Wolf cist so strong, Buh Rabbit slip to de do, an eh draw de bolt, an eh tiptoe back ter eh bed, an den eh say: “Well Budder, ef you mus see me, bad off es me yiz, come in.” Wen Buh Wolf come in, eh fine Buh Rabbit kibber up in eh bed, duh pant an duh moan berry pittiful. Buh Wolf tan by de bed, an eh ax Buh Rabbit: “Enty you tell de Gal, wuh we bin a cote, say me bin nuttne but you farruh ridin horse?” Buh Rabbit say: “Me nebber did.” Buh Wolf say: “You yiz bin tell um so.” Buh Rabbit say: “Me yent.” Den Buh Wolf schway: “De Gal done tell um say Buh Rabbit sisso, an eh bleebe de Gal.” Buh Rabbit run Buh Wolf down dat eh nebber bin nuse no sich wud. Den Buh Wolf say: “Ef you nebber bin say no sich wud, you mus git up an go long me, an knowledge befo de Gal dat you nebber bin sisso.” Buh Rabbit hole back. Eh say eh too weak fuh git outer de bed, and dat ef eh did get up eh too weak fuh walk ter de Gal house. But Buh Wolf foce um. Eh say: “You got ter go. Me guine help you outer de bed, an ef you cant tek you foot, me guine tote you.” Wen Buh Rabbit fine no chance fur um fuh dodge no mo, an dat Buh Wolf boun fuh mek um go, eh git Buh Wolf fuh help um outer de bed. Arter eh git on de flo, Buh Rabbit sorter faint way. Buh Wolf tek um up an cahr um ter de do, an fan um. Buh Rabbit bin a play possum all de time. Wen eh come too, Buh Wolf liff um up an pit um on eh back. Buh Rabbit say: “Hole on, Buh Wolf, me cant set on you back dout fall off: me mus hab someting fuh steady me; you mus gimme someting fuh me fuh hole on ter. Yuh me farruh ole saddle an bridle. Lemme pit dem on you, an den me tink me kin manage fuh go long wid you.” Buh Wolf, him yent spicion nuttne, an eh tan still an leh Buh Rabbit pit de saddle an bridle on um. Onbeknowinst ter Buh Wolf, Buh Rabbit slip behind de do an pit on er pair er keen spur. Den Buh Wolf help um on eh back, an state fuh trot fuh de Gal house. Buh Rabbit say: “Buh Wolf, dont go so fas: me so weak me cant hole on; you mus walk.” Buh Wolf, him haky ter um, an eh come down ter a walk. Wen dem retch de abnue wuh lead from de big road ter de house way de Gal lib, dem shum all dress een white duh settin in de piazza. Soon es dem pass tru de big gate, Buh Rabbit, him gedder de range in eh han, an eh slap spur to Buh Wolf. Buh Wolf say: “You fool, wuh you duh do?” an eh rare an pitch an try fuh trow Buh Rabbit off. Buh Rabbit stick on, an eh clap de spur wus an wus ter Buh Wolf. Wen Buh Wolf fine out eh cant do nuttne, eh keep de abnue straight fur de house. Wen dem duh nigh de house Buh Rabbit holler ter de Gal: “Wuh me bin tell you? Yuh me come pon me farruh ridin horse,” an eh rip spur een Buh Wolf an eh hole um tight. De spur hot Buh Wolf so bad eh couldnt do nuttne but run. Buh Rabbit tun um dest by de piazza, an eh light off eh back, an eh run up ter de Gal, an eh say: “Wuh you tink er me farruh ridin horse?” Buh Wolf so painful, so bex, an so shame, eh keep on run, an eh nebber come back fur see de Gal no mo.

Buh Rabbit, him too scheemy fuh Buh Wolf. Wen de Gal notus how smate Buh Rabbit bin, an how eh mek good eh big wud, eh gen um eh han, an, leetle while arter, dem bin git marry.