LIV.

BUH RABBIT, BUH PATTRIDGE, AN DE COW.

Buh Rabbit, him berry greedy, an him lub fuh tell lie. Him an Buh Pattridge mek greement fuh kill Cow. Buh Pattridge ax Buh Rabbit: “Way we gwine butcher um?” Buh Rabbit say: “Less we dribe um close up ter my house befo we kill um.” Dem done dat, an arter dem kill an skin de Cow, dem cut um up fuh share um. Den Buh Rabbit tell Buh Pattridge: “You tek one er de fore-quarter, caze you know you leetle an cant tote much one time, an me radder you tek de fore-quarter anyhow, caze eh nex de heart, an eh mo sweeter den de res er de meat.” So Buh Pattridge tek one er de fore-quarter an leff fuh him house.

Soon es Buh Pattridge gone duh tote eh meat home, Buh Rabbit tun een an tote all de res er de Cow ter him house, an pit um een eh room, an lock de do. Den eh stan outside duh watch fuh see wen Buh Pattridge would er come back fuh mo meat, so dem all two could er meet same time at de place way dem bin butcher de Cow. Buh Rabbit leh Buh Pattridge git er leely way ahead er um es dem gwine back ter de spot way de Cow bin kill, an wen eh come up eh say: “Hi! Buh Pattridge, way all de meat gone?” Buh Pattridge, him mek answer: “Me dis bin gwine ax you wuh you bin do wid all de meat.” Buh Rabbit say: “How you kin ax me sich er question, wen me bin see er whole gang er Pattridge dis gone from yuh? Me sho say you an you fambly bin come back fuh tek anarruh tun long de meat.” Buh Pattridge mek answer say him an eh fambly nebber bin nigh de Cow sence eh fus leff um. Den Buh Rabbit schway say: “Ef eh yender you, somebody else muster tief de Cow meat wen we all two bin gone;” an so eh fool Buh Pattridge, an mek um bleebe say strange people muster slip up an cahr off de meat, wen all de time him binner de tief, an hab um lock up safe een him house.

You nebber kin trus Buh Rabbit. Eh all fuh ehself; an ef you listne ter him tale, eh gwine cheat you ebry time, an tell de bigges lie dout wink eh yeye.