LI.

BUH WOLF, BUH RABBIT, AN DE RAIN.

Buh Wolf bin er set een de do er him house duh play eh fiddle. Lord er massy! how dat animel did mek dat fiddle talk! Buh Wolf yeye shet tight, an eh dis bin er rock from side ter side, an draw eh bow teh eh berry lenk, en der pat de time wid eh foot. Er hebby shower er rain come on. Buh Rabbit, him bin een de big road not fur from Buh Wolf house. Buh Rabbit yent lub rain, an eh try fuh shelter ehself onder er oak tree wuh kibber wid long moss. De rain lick um een eh yez, an eh leff fuh hunt better place. Es eh pass by Buh Wolf house, eh notus Buh Wolf duh set een de do duh play eh fiddle. Buh Wolf so tek up wid eh play dat eh shet eh yeye an yent duh watch wuh gwine on roun um. So Buh Rabbit mek up eh mine fuh slip een de do pass Buh Wolf, an set een him house tel de rain done ober. Buh Rabbit foot so sofe nobody kin yeddy um wen eh walk. Him no know, but Buh Wolf ketch sight er um outer de corner ob him yeye wen Buh Rabbit hop een de do an run back side er de room. Eh sed down day an mek ehself saterfy, an duh wait topper de rain. Buh Wolf him yent leh Buh Rabbit know say him shum, but eh biggin fuh tun eh chune, an eh play an eh sing: “Tenk God, rain done sen meat een me house. Tenk God, rain done sen meat een me house.” Buh Rabbit yeddy; an eh spicion say Buh Wolf smell um, an fine out say him bin een eh house. Buh Rabbit hair rise, an eh want fuh git out, but eh faid fuh slip back trough de do way Buh Wolf bin er sed down. Buh Rabbit berry oneasy een eh mine, an eh duh consider plan fuh mek eh scape.

Buh Wolf house buil on de groun senker hog pen. Eh mek wid pole. Him bin tink say him got Buh Rabbit safe, an so eh keep on play eh fiddle an sing: “Tenk God, rain done sen meat een me house. Tenk God, rain done sen meat een me house.” Wile Buh Wolf duh mek ehself saterfy say him hab Buh Rabbit an gwine eat um soon es de rain done ober, Buh Rabbit duh grabble, grabble, grabble onder de bottom er de pole, tel eh mek hole big nough, an den eh slip out, onbeknowinst teh Buh Wolf, an hop roun teh de front do, an eh holler teh Buh Wolf: “You duh sing an der play, ‘Tenk God, rain done sen meat een you house,’ but you yent eat um yet, an you yent gwine eat um.” Wid dat eh leff right befo Buh Wolf face. Buh Wolf rale disappint. Eh loss eh dinner. Eh gone an eh heng up eh fiddle, an eh say teh ehself: “Me tought sho me bin hab um, but Rabbit beat my time.”