Part 1

IL PENTAMERONE OVERO LO CUNTO DE LI CUNTE

TOMO II.

IL PENTAMERONE

_DEL CAVALIER_

GIOVAN BATTISTA BASILE

OVERO

LO CUNTO DE LI CUNTE

TRATTENEMIENTO DE LI PECCERILLE

DI GIAN ALESIO ABBATTUTIS.

_TOMO II._

NAPOLI MDCCLXXXVIII. PRESSO GIUSEPPE-MARIA PORCELLI _Con Licenza de’ Superiori._

QUARTA JORNATA

DE LI TRATTENEMIENTE DE LI PECCERILLE.

Poco nnanze era sciuta l’Arba a ccercare lo veveraggio a li fatecature, ca poco poteva stare a spontare lo Sole, quanno li Princepe janche, e nnigre se trovattero a lo luoco de l’appontamiento, nne lo quale erano poco nnanze arrivate le ddece femmene, ch’avennose fatto na ventrecata de ceuze rosse, avevano fatte lo musso comm’a mmano de Tentore, che tutte ’nsiemme se jezero a ssedere a canto na fontana, che sserveva de sciecco a cierte piede de cetrangole, mentre se ntrezzavano la capo pe ccecare lo Sole. Le quale fatto penziero de passare ’n quarche manera lo tiempo, nfichè fosse l’ora de menare le mmasche, pe dare gusto a Taddeo, ed a Lucia, commenzaro a descorrere si devevano jocare a Sseca mantone, a Ccapo o Croce, a Cucco o viento, a Mazz’e ppiuzo, a la mmorra, a paro, o sparo, a la Campana, a le ’Nnorchie, a le Ccastellucce, ad Accosta palla, a Chioppa, o separa, a lo tuocco, a la palla, o a li sbriglie. Ma lo Prencepe, ch’era sfastidiato de tanta juoche, ordenaje, che benesse quarche strommiento, e se cantasse fra tanto, e ssubeto na mano de serveture, che se delettavano, vennero leste co Ccalasciune, tammorrielle, cetole, arpe, chiuchiere, votta fuoche, crò crò, cacapenziere, e zuche zuche; e fatto na bella Zofronìa, e ssonato lo tenore dell’Abbate Zefero, Cuccara giammartino, e lo ballo de Sciorenza, se cantattero na maniata de canzune de chillo tiempo buono, che se pò cchiù priesto trivoliare, che ttrovare; e fra l’autre se dissero. Fruste ccà Margaritella, ca si troppo scannalosa, che ped’ogne poco cosa tu vuoje ’nnanze la Gonnella, fruste cca Margaritella: e chell’autra. Vorria crudel tornare, chianelletto, e po stare sotto sso pede, ma si lo ssapisse, pe straziareme sempre corrarisse; Secotaro appriesso; Jesce, jesce sole, scaglienta ’Mperatore, scanniello mio d’argiento, che bale quatto ciento, ciento cinquanta, tutta la notte canta, canta viola lo Masto de la Scola, o Mastro Mastro mannacene priesto, ca scenne mastro tiesto, co llanze, e co spate dall’aucielle accompagnato. Sona sona zampognella, ca t’accatto la gonnella, la gonnella de scarlato, si non suone, te rompo lo capo: non lassanno chell’autra. Non chiovere non chiovere, ca voglio ire a movere, a movere lo grano de mastro Giuliano: Mastro Giuliano, prestame na lanza ca voglio ire ’n Franza, da Franza a Lommardia, dove stà Maddamma Lucia. Ora mentre stevano a lo mmeglio de lo ccantare, venettero le bidanne ’n tavola, e mmagnaro a ccrepa panza: e Ttaddeo decette a Zeza, che facesse capo, ncignanno la Jornata co lo Canto sujo; la quale pe ssecotare lo Commannamiento de lo Prencepe, accossì decette.

LA PRETA DE LO GALLO.

TRATTENEMIENTO I De la Jornata IV.

_Minec’Aniello pe bertù de na Preta trovata ’n capo a no Gallo, deventa giovene, e rricco: ma essennole truffata da duje Nigromante, torna Viecchio, e pezzente; e cercanno pe lo munno, a lo Regno de li surece ha nova de l’aniello, ed ajutato da duje surece, la recupera, torna a lo stato de primmo, e se venneca de li mariuole._

_Non sempre ride la mogliere de lo latro. Chi tramma fraude, se tesse roine; non c’è ’nganno, che non se scopra, nè ttrademiento, che non venga a la luce: le mmura so spiune de li forfante; latrocinio, e pottanicio crepa la terra, e dicelo: comme ve farraggio sentire, si starrite co l’arecchie a la Casa._

Era na vota a la Cettà de Grotta-negra, no cierto Minec’Aniello, cossì ’ndesditta de la desgrazia, che tutto lo stabele, e lo mobele sujo sotto sopra, era no Gallo patano, che se l’aveva cresciuto a mmollechelle. Ma trovatose na matina allancato da l’appetito, perchè la famme caccia lo lupo da lo vosco, facette penziero de pigliarenne li piccole: e portato a lo mercato, trovaje duje Varvajanne Nigromante, co li quale venuto a li patte, e liberatolo pe mmeza patacca, le decettero, che l’avesse portato a la casa loro, ca l’averriano contato li sbruonzole; e accossì abbiatese li Maghe, e Minec’Aniello retomano, sentette, che parlavano ’nforbisco fra loro, decenno: chi ’nce l’avesse ditto de trovare sto buono ’mmatteto, o Jennarone? sto Gallo senz’autro sarrà la ventura nostra, pe chella Preta, che tu saje, ch’ave drinto la catarozzola, la quale farrimmo legare subeto a n’aniello, pe avere tutto chello, che saperrimmo demannare; e Ghiennarone responnette: stà zitto, Jacovuccio, ca mme veo ricco, e mmanco lo ccreo; e non veo l’ora de scocozare sto Gallo pe ddare no caucio ’n facce a la pezzentaria, e stirareme la cauza, pocca a sto munno le bertù senza tornise, sò ttenute pe pezza de pede, cossì comme vaje, cossì si ttenuto. Minec’Aniello, ch’aveva curzo paise, ed aveva magnato pane de cchiù fforna, sentuto lo zergo, comme fu a no vicariello stritto, votaje Carena, e truccaje pe la porverosa; e curzo a la casa, torze lo cuollo a lo Gallo, e apertole la capo, trovaje la preta, la quale fatto subeto legare a n’aniello d’attone: volenno fare sperienzia de la vertù soja, disse: Vorria deventare guagnone de decedotto anne, e ditto ste parole appena, lo sango se tornaje chiù bivo, li nierve chiù ffuorte, le gamme cchiù fferme, la carne cchiù ffresca, l’uocchie cchiù speretuse, li capille d’argiento se fecero d’oro, la vocca, ch’era no Casale sacchejato, se popolaje de diente, la varva ch’era caccia reservata, deventaje terreno semmenatorio, ’nsomma fatto no bellissimo giovaniello, tornaje a dicere: Io desiderarria no Palazzo de sfuorgio, e ffare parentato co lo Rrè, e lloco te vediste schiudere no Palazzo de bellezza ’ncredibele; dov’erano stanze de spanto, colonne da stordire, Petture da strasecolare: l’argiento sbrommava: l’oro se scarpisava pe terra: le gioje te sciongavano ’n facce, li serveture vrellecavano: li cavalle, e carrozze erano senza numero; ’n somma fece tanta mostra de recchezza, che lo Rrè nce aperze l’uocchie, ed appe a ccaro darele Natalizia la Figlia. Ntra chisto tiempo scopierto li Nigromante la fortuna granne de Minec’Aniello, fecero penziero de levarele da mano sta bona sciorta, e fatta na bella Pipata, che ssonava, e abballava a forza de contrapise, vestennose da Mercante, jettero a ttrovare Pentella la figlia de Minec’Aniello, co scusa de vennerencella; la quale visto cossì bella cosa, le disse, ’n che ppriezzo la tenevano; li quale resposero, che non c’era denaro, che l’avesse potuto pagare; ma ch’essa poteva esserene patrona co ffarele no piacere schitto, ch’era, lassarele vedere la fattura de l’aniello, che teneva lo patre, pe pigliarene lo modiello, e farene n’autro simmele, ca l’averriano donato la Pipata senza pagamiento nesciuno. Pentella, che ’ntese st’afferta, e non aveva sentuto lo Proverbio, a buon mercato penzace; azzettaje subeto la partita, decenno, che fossero tornate la matina appriesso, ca se l’averria fatto prestare da lo Patre. Jutesenne li Maghe, e benuto lo patre a la casa, tante cassessie le disse, e tanta vruoccole le fece, che lo tiraje a pprestarele l’aniello, trovannose scusa, ca steva malenconeca, e se voleva rallegrare no poco lo core. Ma venuto lo juorno seguente, quanno lo pagliamenuta de lo Sole fa scopare le llordizie dell’ombre pe le cchiazze de co Cielo, vennero li Maghe, che non cossì priesto avettero ’n mano lloro l’aniello, che squagliattero comm’a cchillo che scria, che non se ne vedde fummo, che la negra Pentella appe a mmorire d’abbasca. Ma arrivate li Maghe a no vosco, dove de li ramme dell’arvole arcune facevano la ’mpertecata, ed autre joquanno a pane caudo fra lloro, dissero a l’aniello, ch’avesse guastato tutta la ’nvenzione de lo Viecchio rengiovenuto, lo quale trovatose a chillo tiempo ’nnanze lo Rrè, ’nnitto ’n fatto se vedde ’ngrifare, e ghianchiare li capille, ’ncrespare la fronte, ’nzetolire le cciglia, scarcagnare l’uocchie, arrepecchiare la facce, sdentare la vocca, ’mmoscare la varva, auzare lo scartiello, tremmare le ggamme, e sopra tutto li vestite sciammante tornare a brenzole, ed a ppezzolle. Pe la quale cosa lo Rrè, che bedde sto brutto pezzente seduto ’n commertazione cod’isso, lo fece subeto cacciare co mmazze, e mmale parole; lo quale vedennose caduto ’nchiummo, jette chiagnenno a la figlia, e ccercato l’aniello pe remmediare a sto desordene, sentette la burla fattale da li mercante fauzarie, e mmancaje poco, che non se derrupasse pe na fenestra, jastemmanno mille vote la ’ngnoranzia de la Figlia, che pe na negra Pipata l’aveva fatto restare comm’a no brutto Paputo; pe na cosa fatta de pezze, l’aveva arredutto a fare cose de pazzo, pocca era resoluto de ire tanto spierto, e demierto, comm’a lo male denaro, fi che avesse nova de sti mercante. Accossì decenno, puostose no Capopurpo ’n cuollo, li Calantrielle a li piede, na vertola a ttravierzo le spalle, e na mazza ’n mano, e llassanno la Figlia fredda, e ghielata, se pose pe desperato a cammenare, e ttanto vottaje li piede, ch’arrivaje a lo Regno de Pertuso-Cupo abetato da surece, dove pigliato pe spione de le Gatte, fu portato subeto ’nnanze a Rosecone lo Rrè, da lo quale addemmannato chi era, da dove veneva, e che ghiesse facenno da chille paise; Minec’Aniello, dato ’n primmo a lo Rrè na cotena pe ssigno de tributo, le contaje ad una ad una tutte le desgrazie soje, e cconcruse, ca voleva conzumare tanto chillo nigro scuorzo, nficchè avesse nova de chell’arme dannate, che l’avevano fatto Priore de na gioja accossì cara, levannole a lo stisso tiempo lo sciore de la gioventù, lo fonte de la recchezza; la pontella de lo nnore. Rosecone a ste pparole se sentette rosecare da la pietate, e desederuso de dare quarche conzolazione a lo poverommo, chiammaje li Surece cchiù biecchie a conziglio, demannannole parere ’ntuorno a la desgrazia de Minec’Aniello, e commannannole a fare delegenzia si se potesse avere quarche nnova de sti mercante a pposticcio, fra li quale trovannose pe bentura Rudolo, e Sautariello, surece pratteche de le ccose de lo munno, li quale erano state una seina d’anne a na taverna de passo, dissero; stà de bona voglia Cammarata, ca le ccose saranno meglio, che non te cride. Ora sacce, che trovannoce no juorno drinto na Cammara dell’Ostaria de lo Cuorno, dove alloggiano, e sguazzano allegramente l’uommene cchiù stimmate a lo munno, da llà passaro duje de Castiello Rampino, li quale da pò magnare avenno visto lo funno de l’arciulo, descorrevano de la burla fatta a no cierto viecchio de Grottanegra, avennolo corrivato de na preta de gran bertute, la quale disse uno de chille; che se chiammava Jennarone, ca non se l’averria levata maje da lo dito, pe n’avere accasione de la perdere, comm’aveva fatto la figlia de sto Viecchio. Sentenno sta cosa Minec’Aniello, disse a li duje Surece, che si se confidavano d’accompagnarelo a lo pajese de sti mariuole, e de farele recuperare l’aniello, l’averria dato na sarma de caso, e de carne salata, che se l’avessero gauduta ’nzemmora co lo Segnore Rrè; li quale trattannose d’ontare la mano, s’offerzero de fare mare, e mmunte, e cercato lecienzia a la sorecesca corona, partettero: e arrivato dapò luongo cammino a Castiello-rampino, li Surece fecero fermare Minecaniello sotto cierte arvole a ppede de no sciummo, che comm’a sangozuca se pigliava lo sango de li fatecature, e lo ghiettava a lo maro, ed isse trovato la casa de li Maghe, veddero, che Ghiennarone non se levava maje l’aniello da lo dito, pe la quale cosa cercaro pe bia de strataggemma guadagnare sta vettoria; ed aspettato, che la notte tegnesse d’agresta la facce de lo Cielo, ch’era cotta de Sole, comme se fu ghiuto luongo luongo a corcare, accommenzaje Rudolo a rrosecare lo dito de l’aniello, lo quale sentennose fare male, se lo levaje posannolo ’ncoppa na tavola a ccapo lo lietto; la quale cosa visto Sautariello se lo pose ’n vocca, e ’n quatto zumpe foro a ttrovare Minec’Aniello, lo quale co cchiù allegrezza, che non ha lo ’mpiso, quanno l’arriva la grazia, fece subeto deventare duje Asene li Negromante, sopra l’uno de li quale stiso lo ferrajuolo, se accravaccaje comm’a no bello Conte, e carrecato l’autro de lardo, e ccaso, toccaje a la vota de Pertuso-Cupo, dove regalato lo Rrè, e li Conzigliere, le rrengraziaje de quanto bene pe causa lloro aveva receputo, preganno lo Cielo, che maje mastrillo le facesse ’mpedemiento, maje Gatta le portasse dammaggio, maje arzeneco le causasse despiacere; e partutose da chillo pajese, ed arrivato a Grotta-negra, tornato cchiù bello de primma, fu receputo da lo Rrè, e da la figlia co li maggiure carizze de lo munno; e fatto derropare l’Asene da na montagna, se gaudette co la mogliere, non levannose maje chiù l’aniello da lo dito pe non fare quarc’autro scassone,

_Che cane, ch’è scottato d’acqua cauda_, _Ha paura perzì de l’acqua fredda_.

LI DUJE FRATIELLE.

TRATTENEMIENTO II De la Jornata IV.

_Marcuccio, e Parmiero Fratielle, uno ricco, e biziuso, n’autro vertoluso, e pezzente, se vedono dapò varie fortune, lo povero scacciato da lo ricco deventato Barone, e lo ricco caduto ’n meseria connutto vicino a la forca, ma canosciuto ’nnozente, è da lo frate recevuto a parte de le rrecchezze soje._

_Portaje lo caso de Minec’Aniello assaje sfazione a li Princepe, e benedecettero mille vote li surece a ccausa, che lo poverommo recoperasse la preta, e li Maghe recuperassero co na rotta de cuollo lo chirchio de no dito. Ma essennose posta Cecca ’ncorzeta de chiacchiarare, varrianno tutte co la stanga de lo selenzio la porta de le pparole, essa accommenzaje a dicere de sta manera._

Non c’è cchiù gran parapietto contro l’assaute de la Fortuna, quanto la vertù, la quale è contravenino de le ddesgrazie, pontella de le rroine, puorto de li travaglie: la quale te caccia da lo ffuoco, te sarva da le ttempeste, e te guarda da le mmale sciagure, te conforta ne li desguste, te soccorre ne le nnecessetà, e te descrive nne la morte, comme sentarrite da lo cunto, ch’aggio ’n ponta la lengua pe ve contare.

Era na vota no Patre, che aveva duje Figlie Marcuccio, e Parmiero; lo quale stanno pe sautare li cunte co la natura, e stracciare lo quatierno de la vita, se le cchiammaje accanto lo lietto, e le disse: Figlie mieje beneditte, già poco ponno tardare li sbirre de lo tiempo a scassare la porta dell’anne mieje pe fare secozione contra le ccostituzione de sto regno sopra li bene dotale de sta vita, pe chello che devo a la terra; e perzò, amannove quanto le bisciole meje, non devo partireme da vuje senza lassareve quarche buono allecuordo, azzò pozzate correre co la Tramontana de lo buono conziglio per sto guorso de travaglie, ed arrivare a ssecuro Puorto. Aprite addonca l’arecchie, che si be pare niente, chello che ve dongo, aggiate da sapere, ch’è na recchezza, che non ve sarrà arrobbata da Malantrine: na casa, che no la scarruparanno terremote; na possessione, che no la conzumaranno li verrucole. Ora ’n primmo, e antemonia, siate timoruse de lo Cielo; ogne cosa vene da llà ’ncoppa, chi sgarra sta strata, ha fritto lo ffecato.

Non ve facite scannare da la potronaria, crescennove comm’a puorce a lo Pontile: chi striglia lo cavallo sujo, non se po chiammare muzzo de stalla; besogna ajutarese a ccauce, ed a mmuorze, chi ped’autro lavora, pe se mannuca.

Sparagnate quanno nne avite: chi sparagna guadagna; a cavallo a cavallo se fa lo tornese; chi stipa trova: chi ha de donne, bona foglia conne; stipate, che pappe, e non fare, che sfaccie: ca buone so l’ammice, e li pariente, trista la casa dove non c’è niente; chi ha denare fraveca, e chi ha biento naveca, e chi n’ha denare è no paputo, e n’aseno, che d’ogne ttiempo le piglia lo spasemo. E perzò ammico mio cortese, comm’aje la ’ntrata, cossì fa le spese; culo quanto cuopre, terra quant’uoseme: comme te siente, cossì mena li diente, la cucina picciola fa la casa granne.

Non essere troppo chiacchiarone, ca la lengua non ave uosso, e rompe lo duosso; aude, vide, e ttace, se vuoje vivere ’n pace; chello che tu vide vide, chello che tu siente siente, poco magnare, poco parlare, ce caudo de panne, maje fece danne; chi troppo parla, spisso falla.

Contentateve de lo ppoco; meglio sò le ffave, che ddurano, che li confiette, che fenisceno; meglio de lo poco gaudere, che de l’assaje trivolare; chi non pò avere la carne, veva lo vruodo; chi autro non pò, co la mogliere se corca; cot cot autem, arrepezzate comme meglio puoje; chi non pò avere la porpa, s’attacca all’uosso.

Prattecate sempre co mmeglio de vuje, e ffacitele le spese: dimme con chi vaje, ca ti dico chello che ffaje; chi pratteca co lo zuoppo, ’n capo dell’anno zoppeca: chi dorme co ccane, non se n’auza senza pulece: a lo tristo dalle la rrobba toja, e lassannello ire, ca la mala compagnia porta l’ommo a la forca.

Penzate, e po facite, ch’è mmala cosa chiudere la stalla quanno nne sò sciute li Vuoje: quanno la votte è cchiena, appila appila; quanno è bacante non aje ch’appilare; Mazzeca ’n primmo, e po gliutte, ca la gatta pe la pressa fece li figlie cecate: chi cammina adaso, fa bona jornata.

Fuite le ccostiune, e li verrille, non mettenno lo pede ad ogne preta; ca chi sauta troppo pale, se nne ’mpizza quarcuno da dereto: cavallo caucetaro, cchiù nne leva, ca nne dace; chi de graffio fere, de cortellaccio more: tanto và la lancella a lo puzzo, pe nfi che nce lassa la maneca; la Forca è fatta pe lo sbentorato.

Non ve facite ’nfomare da la superbia, nce vole autro che mmesale janco a tavola. Vasciate, e acconciate: maje fu bona la casa, che ffece fummo: lo buono Archemista passa lo destellato pe la cennere, azzò non piglie de fummo, e l’ommo da bene deve passare pe la mammoria, c’ha da tornare cennere, li penziere superbe, pe non restare affommecato da la presonzione.

Non ve pigliaje lo penziero de lo russo, chi se ’mpaccia resta ’mpacciato, è ccosa da Ciantiello ire mettenno l’assisa a le ccetrole, e lo ssale a le ppignate.

No ve ntricate co Ssegnure, e ghiate cchiù ppriesto a ttirare la sciaveca, ch’a servire ’n Corte. Amore de Signure, vino de fiasco la mattina è buono, la sera è gguasto, da li quale non puoje autro avere, che bone parole, mmela fracete; dove te resceno li servizie sterele, li designe fracete, le speranze sesete, sude senza compassione, curre senza repuoso, duorme senza quiete, cache senza cannela, e mmagne senza sapore.

Guardateve da ricco mpezzentuto, da villano resagliuto, da pezzente desperato, da servetore ’mmeziato, da Prencepe ’gnorante, da jodece ’nteressato, da femmena gelosa, da ommo de craje, da esca de corte, da ommo sbano, e ffemmena varvuta, da sciumme cojete, da cemmenere fumose, da male vecine, da figliulo pecciuso, e da ommo ’nvediuso.

Sforzateve finalmente de sapere, ca chi ave arte, ha parte, e chillo campa drinto a no Vosco, che ha sale ’n cocozza, e ha puosto la mola de lo sinno, e mmutato le pprimme arecchie: ch’a buon cavallo no le manca sella.