Part 11

_Nar._ Prestame na patacca, o Cicc’Antuono, E pigliate lo pigno. _Cic._ Affè la prestarria de bona voglia, Si non avesse appunto stammatina Fatto na bella spesa. _Nar._ E mmala sciorte mia, ma che accattaste? _Cic._ Trovaje no buono scuntro De na vorpara nova, Che si millanta scute nne cercava, Tanto nce averria spiso. _Nar._ Sì ccorrivo a lo spennere: Na vorpara lo cchiù, che pò valere, Non passa duje carrine. _Cic._ Mo si, Narduccio mio, non te ne ntienne, Bene mio tornatenne; Non saje ca le borpare so ssagliute, Ca cchiù ccate non pescano, ma scute. _Nar._ Comme pescano scute? io non te ’ntenno. _Cic._ Si n’Aseno, e perdoname: Tu mme pare che mo vienghe a lo munno: Non saje, ca non c’è ommo, Che non tenga a la mano na Vorpara? Co cchessa campa, e sguazza, Co cchessa sforgia, e ngrassa, Chesta le mette bona paglia sotta, Pe cchesta vene a nchiudere li puorce, Co cchesta luce, e se fa chino ’n funno, Co cchesta ’n somma dommena lo munno. _Nar._ Me faje strasecolare, e ghire ’nn estrece, Che bolimmo nguagiare, Ca t’aje nchioccato dareme a rrentennere La luna ntra lo puzzo: E ch’io gliotta, che sia pe cosa rara Lape felosoforo sta Vorpara? _Cic._ Appunto chesto è llape Sciuto da lo lammicco de lo ’nciegno. _Nar._ Frate, pe te la dire, aggio mangiato Lo ppane de cchiù fforna, Nè mmaje l’aggio sentuta mentovare, O io so scianne, o tu mme vuoje nfuscare. _Cic._ Apre l’aurecchia, e mmezza, Ca si no nzemprecone; Poche gente la chiammano Vorpara; Perchè a la primma nfanzia Dà quarche mala facce: Perzò li belle nciegne L’anno cagnato nomme. Perzò che a cchesta etate Tutte le ccose vanno ammascarate. Lo Prencepe le dace Titolo de presiento, o donativo: Lo Jodece l’ha puosto Nomme de lieto Gagio, e ammollamiento, O d’ontare de mano, o de voccone. Lo scrivano deritto, e sà lo cielo S’è stuorto cchiù de n’anca de no cano; Lo Mercante guadagno, L’Artesciano facenna, Lo potecaro nnustria, Lo mariuolo nciegno, o maniucco, Lo sbirro toccatiglia, Lo vannito composta, Lo Sordato recatto, Lo spione lo fatto, La pottana regalo, Lo roffejano abbusco, o paraguanto, Lo sanzaro la dice veveraggio, Lo commissario la chiamma percaccio, Nzomma le dà colore Lo corzaro de spogna, Lo Capitano de quieto vivere (Si n’è quieto tornace,) Ca porta lo streverio, e la roina, E t’assecuro affè ca fa cchiù guerra Co la vorpara soja, che co la sferra. Vuonne cchiù? lo Poeta, Che spoglia de conciette, e de parole Quanta libre le mmattono a le mmano, E Aratio, e Avidio, e Mafaro, e Nasone; Le dace nomme de mmetazione. _Nar._ Te ntenno, Aglie, pe dommene, Mme riesce affè, tu si no bravo fante De li quatto de ll’arte de coppella, No bello tartarone, ed ecciacuorvo: Sì dde lo quaglio, arcivo, e ssapatino, Vuoje dire mo, ca tirano d’ancino. _Cic._ Ed ancino, e Borpara Songo na cosa stessa; Vasta ca non è ommo, Che non la porta sempre a la centura, Chi d’oro, chi d’argiento, e chi de ramma, Chi de fierro, o de ligno, Secunno qualetà de le pperzone, Comm’a dicere mò, chillo gran’ommo, Che conquistaje lo munno, Pe ppescare li Regne Se l’avea fatta d’oro, Ncrastata de carvunchie, e de ddiamante. E chillo che ssalare Fece tanta verrinie a Cicerone, La portava d’argiento; L’aute de mano ’n mano Secunno lo jodizio, e lo potere La fanno comme ponno; Vasta ch’ogn’uno pesca, E perzò a sto ppescare È puosto vario nomme. Arrocchiare, affuffare, arravogliare. Alleggerire, auzare, e sgraffignare, Ed arresediare, ed azzimmare; Sciosciare, scervecchiare, piuziare, Cottiare, annettare, o granciare, Zeppoliare, e ffare maniucche, Fare arravoglia Cuosemo, Fare netta paletta, Fare priore, sonare lo zimmaro, Scotolare vorzillo, E mmenare lo grancio. _Nar._ Tutto chesso puoje dire Co na parola schitto; Joquare a ttrionfiello, Robbare, e assassenare. _Cic._ Si de mala mammoria, io t’aggio ditto Ca lo munno oje lo juorno Dace a lo mmalo titolo de bene; Nè ped autro lo ’nciegno s’assottiglia, Che pe mmettere nn’opra sta vorpara: Che tira, e non se vede, Ch’aggrappa, e non se sente, Ch’afferra, e non se tocca, E sempre piglia, e sempre acciaffa, e ncrocca. _Nar._ Frate mio, senza ’nvidia, Ch’ogne cosa po va pe l’acqua a bascio: De lo mmale acquistato Non se ne gaude maje lo tierzo arede: La gente ricca a ffunno vace a ffunno, Se vedono le ccase scarropate, Le ghienimme destrutte, e mpezzentute, Sempre spierte, e ddemierte: Ca disse buono no mastro de scola, Tutto lo stuorto nne porta la mola. _Cic._ Ogge li cuolle stuorte So mpise da la famme, Chi no arrobba, no ha robba, Chi non piglia, non ha paglia; Chi no abbusca, ave sempre a l’arma abbasca, E chi non pesca maje, maje non fa pasca. _Nar._ A lo rrestetuire Fammene tre cavalle; Otra, che spisso spisso Na forca de tre cotte, Goliuso abbuscare babuine, E ppuosto pe ddecreto Ncoppa a no ciuccio comm’a babione Ha da la Corte na mitria de carta, A lo mercato, vedese mercato, Pe non soffrire famme, resta nfamme, Perde lo nnore, pe sguazzare n’ora; Pe no poco de ramma Se percaccia no rimmo, Lo zuco de l’agresta Le torna acqua de maro; Pe aggrassare co l’ogna Se procura tre llegna, Le ppenne le deventano pennone: Che serve tanta cuoccole, ed argiamme, Tanta sbruonzole, e ppurchie, E picciole, e ppennacchie; E ffrisole, e ffellusse, Si ped’assempie, e pprove tante, e ttante, Non è contento maje chi ha cchiù ccontante. _Cic._ Si tu pruove na vota sta Vorpara, Non te ne spise cchiù, ch’è comm’a rrogna Che quanto gratte cchiù, cchiù dà prodito. Dammo na giravota Pe l’arte, e pe l’affizie de sto munno, E bedarraje, ca se ne serve ogn’ommo, Commenzammo de primma, ed antemonia Da chi tene vassalle: Ecco abbista, e allumma no massaro, Che s’ha nchiuso li puorce, Oje le cerca pe mpriesto tanta scute, Da retornarencelle, Quanno pò chiove passe, e ffico secche; Craje manna pe tant’uorgio Pe lo rrestituire a la recouta; Mo le commanna l’aseno, o li vuoje Co ttitolo ca serve pe la Corte, E ttanto durarrà sto frusciamiento, Tanto secotarà st’ammaro assesio, Che chillo desperato Fa quarche ngiuriata a lo Vaglivo, O le joca de mano; O negrecato, Che non l’avesse cacato maje la mamma, Che s’avesse spezzato La noce de lo cuollo: ecco è ppigliato; E schiaffato de pesole a na fossa, Puoste cippe a li piede, Misso fierro a lo cuollo, E mmanette a le mmano, Co no spetaffio puosto a lo canciello: Banno, e commannamiento, olà sfrattate, Chi parla a chisto, paga seje docate. ’N somma grida, che buoje, Manna mmemoriale, miette mieze, Non è mmaje liberato, Si dapò tante acite De strazie, e de tormiente, De spese, e de travaglie, Non fa quarche composta: All’utemo, che ha fatto de no lupo Chiena la voglia, e ssazia, Mentre assassina, e dditto ca fa grazia. _Nar._ O mmardetta Vorpara, Malannaggia la forgia sbregognata Dove fuste vattuta, e ttemperata. _Cic._ Siente lo Capitanio, e Mastro d’atta, Poichè da lo voje granne È mmezzato d’arare lo vetiello, Nfruceca testemmonie, mbroglia carte, Allonga le settenze, Occupa le scritture, Carcera senza causa, E lloco la vorpara fa pe ssette; E dove deverria Essere strascenato, piglia nomme, Ch’è ppratteco a l’affizio, Ch’è n’ommo percacciuolo, ed ha jodizio. _Nar._ Chesto è cchiù ca lo vero, E si n’ommo da bene se ne torna Nietto de vorza, comme È nnietto de coscienzia (Cosa che mm’è socciesso Fuorze dudece vote) ogn’uno dice, Che mmeglio se nne stia, Ca non è arte soja E ca è peccato darele patiente, Ch’è no catarchio, e ca non fa proviente. _Cic._ Lo Miedeco, si è ttristo, Tira a luongo lo mmale, E ttene parte co lo speziale: S’è buono puro mostra, Ca fra tante rezette Puro sà sto secreto, Quanno stenne la mano da dereto. _Nar._ De sta Vorpara non puoje dire male, Ch’è mmodesta, e nnorata, Anze premmio fatale, Chisto se pò chiammare, Paghe dereto a chi te fa cacare. _Cic._ Lo mercante non perde La coppola a la folla, Dà la robba stantiva, La teletta ncollata, Pe le dare lo piso: Jura, sconciura, afferma Ca lo ffraceto è nnuovo, Ca lo sfatto è de trinca, E co belle parole, e ttriste fatte, Te mpapocchia, e te mostra Lo ghianco pe lo nnigro, e truove sempre Drinto a la mercanzia quarche magagna, Ed a lo mmesurare Co no galante sfarzo Stira lo drappo, azzò lo ttruove scarzo. _Nar._ Perzò no è mmaraviglia, Quanno lo cielo le vota la faccia, E pe no fallo perdono la caccia. _Cic._ Lo chianchiero te venne No caperrone viecchio, e mmalaticcio Pe ccrastato, o magliato; No mazzone, pe ghienco, Che te l’apara tutto D’oro brattino, e sciure; Pe ffare cannagola. Venne l’ossa pe pporpa, e ccontr’assisa, E sempre è cchiù la jonta, che lo ruotolo: A lo ppesare pò, Ddio te ne scanza, Joca de deta, e scenne la valanza. _Nar._ E ccosa d’abbottare li permune, Perzò la festa pareno Barune. _Cic._ L’agliararo te ceca a la mesura, E pe mmostrare ca te dace a ccurmo L’uoglio, e ca arriva a ssigno, Carca lo funno de lo mesoriello, Che tanto s’auza quanto fa scartiello: Mmesca sempre la semmola co l’uoglio, Che dà cuorpo, e ccolore: Vide na scumma d’oro, Inchie no bello agliaro, E po truove na feccia, Anze truove na mmesca d’acqua, e morga, Che dinto na locerna negra, e amara, Te fa lo piccio, pedeteja, e spara. _Nar._ Non c’è pparmo de nietto, Ogne bene è ppassato Munno corrutto e quanto si cagnato? _Cic._ Lo tavernaro ha le ccarrafe scarze, Tutta la notte trafeca, E si trova la votte, C’ha d’averzeto, o liento na stoccata, Le fa de janco d’ova na stoppata: Ma sopra tutto spacca Lo vino buono co lo vino tristo, Fa de l’acito asprinio, Anze de l’acqua vino, E co le ddeta copre lo cannuolo De la carrafa, e ngarzate la vista, Che maje non vide la mesura trista. _Nar._ O nigro chi nce mmatte, Ch’abbesogna co lloro No stommaco de fierro, e borza d’oro. _Cic._ Lo cosetore face la bannera, E bede ad ogne ttaglio, se nc’è ttaglio: Mette lo ffilo a ccunto de la seta: Si lo puorte a ccomprare Vace co l’aco ’n pietto, Te fa largo lo patto, E torna a lo Mercante pe lo fatto: Ma chesto è mmanco sale, A la lista te mbroglia, Che mmardice a lo llejere lo cunto, Lo nigro punto, che t’aje puosto mpunto. _Nar._ O viate, o felice l’anemale, Che ponno stare nude A buosche, a balle, a cchiane, ed a ppennine, Ne viveno soggette a ste rroine. _Cic._ Siente, li rrobbe-vecchie a la Jodeca, Si te vene capriccio De vennere quarcosa, Nce truove na confarfa, Tanto che si pigliato pe la canna; S’accatte no vestito, Mo te lo miette, e mo lo truove rutto, Che dura da Natale a Santo Stefano, E co ddanno, e co scuorno, Vaje pinto, e punto, a no medesmo juorno. Ma che ghire toccanno tante taste? Ca nce vorria na resema de carta A dire tutte quante L’arte, che fanno annore a sta Vorpara; E quante sbrisce, e ssicche Se so fatte pe cchesta e grasse, e rricche. _Nar._ Nvenzione mmardetta, Tuosseco de lo nnore, Pe la quale se vede Scura la veretà, negra la fede. _Cic._ Dì quanto vuoje, ch’ogne uno se nne serve; Io mora strangolato co na funa Si pe ttutto oje non me ne compero una. _Nar._ O meglio te schiaffasse l’antecore, Si aduopre la Vorpara a chisto munno, Co la Vorpara si ttirato a ffunno.

_Non saperria dicere, si de la bella jelatina de sta jornata piacesse cchiù la capo, o la coda, perchè si l’una fu ssaporita, l’autra se nne scese drinto a le mmedolla dell’osse, e fu tanto lo gusto de lo Prencepe, che pe mmostrarese cortese, e lliberale veramente da Signore, chiammaje lo Guardarrobba, e ordenaje, che se desse a li recetante na nforra de cappiello viecchio, che fu de lo vavo; e perchè lo Sole era stato chiammato da pressa all’autro polo, pe ssoccorrere a li state suoje, occupate dall’ombra, auzatose da sedere, se pigliaro la strata ogne uno a la pagliara soja, e co ccommessione de tornare la matina co l’appontamiento stisso a lo medesemo luoco._

SCOMPETURA DE LA JORNATA QUARTA.

QUINTA JORNATA

DE LI TRATTENEMIENTE DE LI PECCERILLE.

Già l’aucielle referevano a la Mmasciatrice de lo Sole tutte li ’mbruoglie, e ttrapole, che s’erano fatte la notte, lo Prencepe Taddeo, e la Prencepessa Lucia s’erano conzegnate mateniello mateniello a lo luoco soleto, dove se n’erano venute a ssisco nove femmene de le ddece. La quale cosa vista lo Prencepe demannaje, perchè non era venuta Jacova; e ddittole, ca l’era pigliata na sceca scoperta ’nsanetate soja, commannaje Taddeo, che se trovasse n’autra femmena, che soppresse a lo luoco de chella, che mmancava. E accossì pe non ghire troppo lontano, fecero venire Zoza, che steva faccefronte lo palazzo riale, la quale fu rrecevuta da Taddeo co granne compremiento, si pe obreco, che le teneva, comme pe la ncrenazione, ed affezzione, che l’aveva puosto: la quale nsiemme co ll’autre avevano cuoveto, chi nepeta sciuruta, chi spicadosso, chi aruta a ccinco, e chi na cosa, e chi n’autra; chesta se fece na giorlanna, comme si avesse da recetare na farza, chella no grammaglietto, l’una se mpezzaje na rosa spampanata ’n pietto, l’autra se mese no garofano scritto ’n vocca, ma perchè nce volevano fuorze quatt’ora a secarese pe mmiezo lo juorno, azzò maturasse lo tiempo de smorfire, ordenaje lo Prencepe, che se facesse quarche ghiuoco pe ttrattenemiento de la mogliere, e dato penziero a Cola Jacovo lo Scarco, ommo de granne ’nciegno, isso si comme avesse nsaccocciola le mmenziune subeto la trovaje decenno. Fu sempre nzipeto, Segnure mieje, chillo gusto, che non ha quarche rammo de jovamiento, perzò, non foro trovate li trattenemiente, e le beglie pe no piacere dessutele, ma de no guadagno gustuso perzì, pocca non sulo se vene a passare lo tiempo co sta manera de juoche, ma se scetano, e fanno prunte li nciegne a ssaperese resorvere, e a responnere a cchello che se demmanna, comm’a punto soccede a lo juoco de li juoche, ch’aggio penzato de fare, lo quale sarrà de chesta manera. Io proponerraggio a quarche femmena de chesse na sorta de juoco, la quale senza penzarence m’ha da dicere subeto ca no le piace, e la causa perchè no le dace a l’omore, e chi tardarrà a rresponnere, o responnerà fore de proposeto, aggia da pagare la pena, che sarrà fare chella penetenzia, che commannarrà la Segnora Prencepessa; e pe dare prencipio a lo juoco, io mme vorria jocare co la Segnora Zeza na meza patacca a ttrionfiello, e Zeza subeto respose, non ce voglio joquare, perchè non so Mariola. Bravo (disse Taddeo) ca chi arrobba, ed assassina chillo trionfa. S’è cossì, leprecaje Cola Jacovo, mme trovo no quatto, e mmiezo pe ghioquaremillo co la Segnora Cecca a Banco falluto. Non me nce catacuoglie, respose Cecca, ca non so mercante. Ha raggione, disse Taddeo, ca pe lloro è fatto sto juoco. A lo manco Segnora Meneca, secotaje Cola Jacovo, passammo no paro d’ore a lo male contento. Perdonateme, ca chisso è ghiuoco de Cortesciane, respose Meneca. Nce ha dato a lo chiovo, disse Taddeo, ca sta razza de gente maje stette de bona voglia. Io saccio, repigliaje Cola Jacovo, ca la Seg. Tolla se joquarrà co mico na serva de prubeche a quatto montune. Lo cielo mme ne scanza, respose Tolla, ca chisto è ghiuoco de marite, c’hanno mala mogliere. Non potive responnere meglio, respose Taddeo, ca sto juoco è ffatto pe loro, che spisso spisso fanno a tozza-martino. A lo mmanco, Segnora Popa, leprecaje Cola Jacovo, joquammo a binte fegure, ca ve dongo la mano. Non sia pe ditto, respose Popa, ca chisso è ghiuoco d’adulatore. Ha parlato da Orlanno, disse Taddeo, ca chisse fanno vinte, e trenta figure trasformannose sempre, che bonno, pe mmettere drinto a lo sacco no povero Prencepe; e secotanno Cola Jacovo, disse Segn. Antonella, non perdimmo sto tiempo pre vita vostra; ma joquammoce no bello piatto de zeppole a la gabbella. L’aje trovato, respose Antonella, manco male, ca mme tratte da femmena mercenaria. Non dice male, disse Taddeo, ca sta jenimma de femmene se soleno spesse vote ngabbellare. Diascace arrivala, secotaje Cola Jacovo, io me la nzonno, ca se ne passarà l’ora senza pigliareme spasso, si la Segn. Ciulla non se joqua co mmico na mesura de lupine a cchiammare. E che so fatta sbirro, respose Ciulla, e Taddeo subeto respose. Ha ditto veramente de truono; perchè è affizio de li Vaglive, e de li Tammare lo chiammare a Ccorte. Vienetenne la Segn. Paola, tornaje a dire Cola Jacovo, e ghioquammoce no tre decinco a Picchetto. L’aje sgarrata, respose Paola, ca non so mormoratore de Corte. Chesta è dottoressa, respose lo Prencepe, ca non c’è luoco, dove cchiù se picca lo nnore de li qualisse, ch’a le ccase nostre: Senz’autro, repigliaje Cola Jacovo, la Segn. Ciommetella se contentarrà de joquare co mmico a Carrettuso. Merregnao, respose Ciommetella, bello juoco de masto de scola m’avive trovato. Chessa deve pagare la pena, disse Cola Jacovo, che non ha che fare la proposta co la resposta. Va fatte tornare li denare da lo masto, respose lo Prencepe, ca la resposta ncascia de seviglia, perchè li Pedante joquano accossì bravo a Carrettuso, che si bè perdono cinco, sengano la partita. Ma Cola Jacovo votatose all’utema de le ffemmene le disse: Non me pozzo dare a ccredere, che la Seg. Zoza voglia refutare comme l’autre no nvito, perrò mme farrà piacere joquarese co mmico no cianfrone a sbracare. Guarda la gamma, respose Zoza, ca chisso è ghiuoco de peccerille. Ora chessa sì deve fare la penetenzia, concruse Taddeo, perchè a sto juoco nce joquano pe fi a li viecchie, e perzò Segnora Lucia, tocca a buje de darele la pena, e auzatase Zoza se jette a ngenocchiare nnante la Prencepessa, la quale l’ordenaje pe ppenetenzia, che cantasse na Villanella Napoletana, la quale fattose venire lo tammorriello, mentre che lo cocchiero de lo Prencepe sonava na cetola, cantaje sta canzona.

Si te credisse dareme martiello, E ch’aggia filariello, Ca faje la granne, e ’ncriccheme lo naso Và figlia mia, ca Marzo te n’ha raso. Passaje lo tiempo, che Betta filava, E che l’Auciello arava, Chiù non sento d’Ammore, o frezza, o sciamma, Spelata è Patria, mo non c’è cchiù mmamma. Da c’hanno apierto ll’uocchie li gattille, So scetate li grille, Si faje niente speranza a sse bellizze: Va ca n’aje scesa, quanto curre, e mpizze. Aggio posta la mola de lo sinno Nè cchiù mme movo a zinno, E già conosco da la fico l’aglio, Non nce penzare cchiù, ca non c’è ttaglio.

Scompette a tiempo la canzona, e lo gusto de tutte, quanno se mesero le ttavole a dove si nce fu buono da smorere, nce fu mmeglio da sciosciare; ma comme fu sigillato lo stommaco, e levato li mesale, fu dato commannamiento a Zeza, che scopresse l’accoppatura de li cunte, la quale, si be steva la scuressa, ch’aveva la lengua grossa grossa, e l’aurecchie peccerelle, pure fece lo debeto sujo, cossì decenno.

LA PAPARA.

TRATTENEMIENTO I De la Jornata V.

_Lilla, e Lolla accattaro na papara a lo mercato, che le cacava denare, ll’è cercata mpriesteto da na commare, e trovanno lo contrario, nce l’accide, e la jetta pe na fenestra, s’attacca a lo tafanario de no Prencepe, mentre faceva de lo cuorpo, ne nce lo pò scrastare nesciuno fora che Llolla, pe la quale cosa lo Prencepe se la piglia pe mmogliere._

_Gran settenza fu chella de chillo grann’ommo da bene, che l’artesciano lo chiavettiero, lo museco lo museco, lo vecino lo vecino, e lo poveriello lo pezzente, pocca non c’è pertuso a la fraveca de lo Munno, dove non faccia la tela sto mmarditto Ragno de la nvidia, la quale non se pasce d’autro, che de le rroine de lo prossemo, comme particolaremente sentarrite da lo cunto che ve derraggio._