Part 17

Avea lo Rrè de Torre-longa no figlio mascolo, ch’era l’uocchio deritto sujo, sopra lo quale aveva puosto le ppedamenta d’ogne speranza, nè bedeva l’ora de trovarele quarche buono partito, ed essere chiammato Vavo. Ma sto Prencepe era tanto nsammorato, e nsateco, che parlanno de mogliere, scotolava la capo, e lo trovave d’arrasso ciento miglia, tanto che lo povero Patre, che bedeva lo figlio spurceto, ed ostenato, scacata la jenimma soja, steva cchiù schiattuso, crepantuso, annozzato, e ntorzato de na Pottana, che ha perduto l’accunto; de no Mercante, che l’è falluto lo correspondente; de no parzonaro, che l’è mmuorto l’aseno; pocca non lo movevano le lagreme de lo Patre, non l’ammollavano le prieghe de li vassalle, nè lo levavano da pede li consiglie de l’uommene da bene, che le mettevano nnanze a l’uocchie lo gusto de chi l’aveva generato, lo besuogno de li puopole, nteresso de se stesso, che faceva punto finale a la linea de lo sango Reggio, che co na proffidia de Carella, co n’ostenazione de mula vecchia, co no cuojero de quatto deta a lo ssottile, aveva mpontato li piede, ammafarato l’aurecchie, e ntompagnato lo core, che poteva sonare ad arme. Ma perchè sole soccedere cchiù nne n’ora, che ’n ciente anne, e non puoje dicere, pe sta via non passe; occorze, che trovatose no juorno tutte nziemme a ttavola, volenno lo Prencepe tagliare na recotta pe mmiezo, mentre teneva mente a le cciavole, che passavano, se fece desgraziatamente no ntacco a lo dito, tale, che cadenno duje stizze de sango ncoppa a la recotta, fecero na mesca de colore accossì bello, e graziuso, che o fosse castico d’Ammore, che l’aspettava a lo passo, o volontà de lo Cielo, pe cconzolare chillo ommo da bene de lo Patre, non era tanto molestato da la polletra domesteca, quanto da sto pollitro sarvateco era tormentato, le venne capriccio de trovare na femmena accossì ghianca, e rrossa, comme era appunto chella recotta tenta da lo sango sujo; e disse a lo patre: Messere mio, s’io non aggio chelleta de sta petena, io so barato. Maje femmena m’appe sango, e mo desidero femmena comm’a lo sango mio. Perzò resuorvete, si mme voje sano, e bivo, a dareme commodetà de ire pe sto munno cercanno bellezza, che vaga a pilo co sta recotta, autramente fenarraggio lo curzo, e ghiarraggio a spaluorcio. E lo Rrè sentenno sta bestiale resoluzione, le cascaje la casa ’n cuollo, e rrestanno attassato, no colore le sceva, e n’autro le traseva, e quanno tornaje nse stisso, e potte parlare le disse: Figlio mio, visciola dell’arma, popella de sto core, stanfella de la vecchiezza mia, che sbota capo t’è pigliato si sciuto da sinno? aje perduto lo cellevriello? o asse, o seje non bolive mogliere pe levareme l’arede, e mo te n’è benuto golio pe cacciareme da sto munno; dove, dove vuoje ire spierto, e demierto consommanno la vita, e lassare la casa toja; casa toja, focolariello tujo, pedetariello tujo? non saje a quanta travaglie, e quanta pericole se mette chi fa viaggio; fatte passare, o figlio, la cricca; fatte accorrejere: non volere vedere sta vita tarrafinata, sta casa caduta nchiummo, sto stato juto a mmitto; ma cheste, ed autre parole da n’arecchia le trasevano, da n’autra le scevano, ed erano tutte jettate a mmaro, tanto che lo nigro Rrè visto ca lo figlio era na ciaola de campanaro, datole na bona vrancata de scute, e duje, o tre serveture, le dette lecenzia, sentennose scrastare l’arma da lo cuorpo, e affacciatose a no gaifo chiagnenno a bita tagliata, lo schiuse co l’uocchie fi che lo perze de vista. Partuto addonca lo Prencepe, e lassato lo patre nigro, e ammarecato, commenzaje a trottare pe ccampagne, e pe buosche, pe mmunte, e pe balle, pe cchiane, e ppennine, vedenno varie paise, trattanno deverze gente, e sempre coll’uocchie apierte a bedere, se trovasse lo verzaglio de lo desederio sujo; tanto che ’n capo de quattro mise arrivaje a na marina de Franza, dove lassato li serveture a lo Spitale co na mingrania a li piede, se nvarcaje sulo ncoppa no liuto Genovese, e toccanno la vota de lo stritto de Gebelterra, llà pigliaje no vasciello cchiù gruosso, e passaje a la vota dell’Innie, cercanno sempre de Regno ’n regno, de Provinzia ’n provinzia, de Terra ’n terra, de strata ’n strata, de casa ’n casa, e de cafuorchie ’n cafuorchie, si potesse mmattere l’originale spiccecato a la bella mmagene, che aveva depenta a lo core, e tanto menaje le gamme, e botaje li piede, ficche arrivaje all’Isola dell’Orche, dove dato funno, e smontato ’n terra, trovaje na vecchia vecchia, ch’era secca secca, ed aveva la facce brutta brutta, e la quale contato la causa, che l’aveva strascinato a chille paise, la vecchia remase fora de se stessa, sentenno lo bello crapriccio, e la crapicciosa chimera de sto Prencepe, e li travaglie, e li riseche passate pe scrapicciarese, e le disse: Figlio mio, appalorcia, ca si t’abbistano tre figlie mieje, che sò lo maciello de le carne ummane, non te preggio pe tre ccalle; ca miezo vivo, e miezo arrostuto te sarrà catalietto na tiella, e sepotura no ventre: ma agge lo pede a lepare, ca non jarraje troppo nnante, che trovarraje la fortuna toja. Sentuto chesto lo Prencepe, tutto sorriesseto, agghiajato, atterruto, e sbagottuto, se mese la via fra le gamme, e senza manco dire mme requaquiglio, commenzaje a solarese le scarpe, ficche arrivaje a n’autro pajese dove trovaje n’autra vecchia peo de la primma, a la quale contato pe fi a lo rumme lo fatto, puro le disse squaglia priesto da ccà, se non vuoje servire de marenna a l’Orchetelle figlie meje, ma tocca ca t’è nnotte, no poco cchiù nnante trovarraje la fortuna toja. Chesto sentenno lo scuro Prencepe, commenzaje a tallonejare comme s’avesse le bessiche a la coda, e tanto cammenaje, che trovaje n’autra vecchia, la quale steva seduta ncoppa na rota, co no panaro nfilato a lo vraccio, chino de pastetelle, e confiette, che deva a mmagnare a na mano d’Asene, che dapò se mettevano a sautare pe coppa na ripa de no sciummo, tiranno cauce a cierte povere Cigne. Lo Prencepe arrevato a la presenzia de sta vecchia, e fattole ciento liccasalemme, le contaje la storia de lo pellegrinaggio sujo, e la vecchia co bone parole conzolannolo, le deze na bona colazione, che se ne alliccaje le ddeta, ed auzato da tavola le consegnaje tre Cetra, che parevano tanno tanno cogliute dall’arvolo, e dezele ancora no bello cortiello, decenno, a sta medesema pedata puoje tornare a la Talia, che aje chino lo fuso, ed aje trovato chello che baje cercanno; vatenne addonca, e comme si poco lontano de lo Regno tujo a la primma fontana, che ttruove, taglia no Citro, che ne scerrà na Fata, decennote damme a bevere, e tu lesto co l’acqua: autramente squagliarrà commo argiento vivo, e se non si diestro co la seconna Fata, e tu apre l’uocchie ad essere solliceto co la terza, che non te scappa, dannole subeto a bevere, che averraje na mogliere secunno lo core tujo. Lo Prencepe tutto prejato, vasaje ciento volte chella mano pelosa, che pareva groppa de puorco spina, e pigliato lecienzia, partette da chille paise, ed arrivato a la marina navecaje a la vota de le ccolonne d’Ercole, e trasuto a li Mare nuostre, e dapò mille borrasche, e rrisiche pigliaje puorto na jornata lontana da lo Regno sujo, ed arrivato a no bellissemo voschetto, dove l’ombre facevano palazzo a li prate, che non fossero viste da lo Sole, smontaje a na fontana, che co la lengua de cristallo, chiammava le gente a ffisco a refrescare la vocca, dove sedutose ncoppa a no trappito soriano, che facevano erve, e sciure, cacciatose lo cortiello da la vaina, accommenzaje a tagliare lo primmo citro, ed ecco scette comme no lampo na belledissima figlia, janca comm’a latte, e nnatte, rossa commo a fraola a schiocca, decenno; damme a bevere. Lo Prencepe comme accossì spantato, canna apierto, ed ammisso a la bellezza de la Fata, e non fu destro a darele l’acqua, tanto, che l’apparere, e lo sparere fu tutto a no tiempo. Si chesta fu saglioccola a la catarozzola de lo Prencepe, lo cconsidera chillo, che desideranno gran cosa, avennola drinto le granfe, la perde. Ma taglianno lo secunno Citro, le soccesse lo medesemo, e fu la seconna varrata, che appe a le chiocche, tanto che facenno duje pescericole dell’uocchie jettava lacreme a tocce a tocce, a fronte a fronte, a tuzzo a tuzzo, a facce a facce, ed a tu a tu, co la fontana, co le cedenno mollica, e fra tanto gualiannose diceva: E comme so sciagurato, benaggia aguanno? doje vote mme l’aggio fatta scappare, comme s’avesse le ccorde a le mmano, che mme venga la chionchia, e comme mme movo commo a scuoglio, dove deverria correre comme a levriero: Affè ca l’aggio fatta brava. Scetate poverommo, n’autra nce n’è: a le ttrè vence lo Rrè: o sto cortiello m’ha da dare la Fata, o fare na cosa, che ffete. Accossì decenno, taglia lo tierzo Citro, esce la terza Fata, dice commo a l’autre, damme a bevere, e lo Prencepe subbeto le projette l’acqua, ed ecco le resta ’n mano na figliola tennera, e ghianca comma na joncata, co na ntrafilata de russo, che pareva no presutto d’Abruzzo, e na sopressata de Nola, cosa non vista maje a lo munno, bellezza senza mesura, janchezza fora de li fore, grazia cchiù de lo cchiù; a li capille suoje nce aveva chiuoppeto l’oro Giove, de lo quale faceva Ammore le ssajette pe spertosare li core, a chella facce nce aveva fatto na magrejata Ammore, perchè ne fosse mpesa quarche arma nnozente a la forca de lo desederio, a chille uocchie nce aveva allummato duje cuorpe de lummenaria lo Sole, perchè a lo pietto de chi la vedeva se mettesse fuoco a le butte, e se tirassero furgole, e tricchetracche de sospire, a chelle lavra nc’era passata Venere co lo tiempo sujo, danno colore a la Rosa pe pognere co le spine mill’arme nnammorate: a chillo pietto nce aveva spremmuto le zizze Junone, pe allattare le boglie umane: ’n somma era accossì bella da la capo a lo pede, che non se poteva vedere la chiù ppentata cosa, tanto che lo Prencepe non sapea che l’era socciesso, e mmirava fore de se stisso, accossì bello partoro de no Citro, accossì bello taglio de femmena sguigliata da lo taglio de no frutto, e deceva fra se stisso duorme, o si scetato, o Ciommetiello? tu aje ncantata la vista, o t’aje cauzato l’uocchie a la mmerza, che cosa janca, è sciuta da na scorza gialla? che pasta doce da l’agro de no Citro? che bello mascolone dall’arille? All’utemo addonatose, che non era suonno, e ca se joquava da vero, abbracciaje la Fata, dannole ciento, e ciento vase a pizzechille, e dapò mille parole ammorose de vaga, e de riesto, che se decettero nfra lloro, parole che comme a canto fermo erano contrapontiate da li vase nzoccaratielle, dicette lo Prencepe: Non voglio, arma mia portarete a lo pajese de patremo senza sfuorgie, digne de ssa bella perzona, e senza compagnia de na Regina meretevole, perzò saglie ncoppa sto cierro dove pare, che pe lo besuogno nuostro aggia fatta la natura no recuoncolo nforma de cammarella, ed aspettame a lo retuorno, ca senz’autro mecco le scelle, e nnanze che secca sta sputazza mme ne vengo, pe te carrejare vestuta, ed accompagnata, comme se deve a lo Regno mio: e accossì fatto le debete zeremmonie se partette. Fra chisto miezo na schiava negra, era mannata da la patrona co na lancella, a pigliare acqua a chella fontana, la quale vedenno a caso dintro l’onne la mmagene de la Fata, credenno d’esser essa medesema, tutta maravegliata, commenzaje a dicere. _Che bidire, Lucia sfortunata, si accussì bella stare, e Patruna mannare acqua biliare, e mi sta cosa compurtare?_ Accossì decenno, roppe la lancella, e tornaje a la casa, e domannata da la patrona, perchè aveva fatto sto male servizio, respose: _mi juta fontanella tussata preta lancella_. La Patrona gliottutose sta pastocchia, ll’autro juorno le deze no bello varrile, che ghiesse a nchirelo d’acqua; la quale tornata a la fontana, e bisto de nuovo trasparere chella bellezza drinto chell’acqua, disse co no gran sospiro: _mi no stare schiava mossuta, mi no star bernaguala, pocca star bella, e scentil, e portare fontana baril?_ e accossì decenno, tuffete n’autra vota, e scassanno lo varrile, nne fece settanta frecole, e tornata a la casa, tutta mbrosolianno, disse a la patrona: _Aseno bassato, barrile tossato, ’nterra cascato, e tutto sfrecoliato_. La mara patrona sentenno chesto non potte avere cchiù fremma, e dato de mano a na mazza de scopa, la tontolejaje de manera, che se nne sentie pe na mano de juorne, e pigliato n’otra disse: Curre, scapizzate, schiava pezzente, gammagrillo, culo pertosato ucciahè, curre, nè fare fiamma fiamma, ne cierne Lucia, e portame chesta chiena d’acqua, si no te peso comme a ppurpo, e te faccio tale ntosa, che mme ne nnuommene. Corze a gamme ’n cuollo la schiava, ch’avea provato lo lampo, ed avea paura de lo truono, e nchienno l’otra tornaje a mmirare la bella mmagena, e disse: _Mi stare marfusa, s’acqua biliare: meglio è maritar a sciorgia mia: no stare bilissa chista da far morta arraggiata, e sirvire patruna ncolarata_. Accossì decenno, pigliaje no spingolone, che teneva ncapo, e commenzaje a sperciare l’otra, che parze na chiazza de giardino co l’acqua a trademiento, che facette ciento fontanelle, la quale cosa vedenno la Fata, commenzaje a rridere a schiattariello. La schiava, che sentette sta cosa, votanno l’uocchie, s’addonaje de ll’agguaito, e parlanno fra se stessa disse: _Tu stare causa, che mi massiata, ma non curare?_ e dapò dicette ad essa: _Che fare loco susati bella figliola?_ ed essa ch’era la mamma de la cortesia, sbufaraje quanto aveva ’n cuorpo, senza lassare jota de quanto l’era accascato co lo Prencepe, lo quale aspettava d’ora ’n ora, e de momento ’n momento co bestite, e compagnia pe ghire a lo regno de lo Patre a ngaudiarese cod’isso. Sentuto chesto la schiava ngarzapelluta, penzaje guadagnare sta premmera pe mmano, e leprecaje a la Fata. _Pocca aspettare marito lassare venire susa, e pettenare capo, e fare cchiù bella;_ la Fata disse, singhe la ben-venuta, comm’a lo primmo de Maggio, e arrampecannose la schiava, ed essa projennole la mano jancolella, che afferrata co chelle sproccola negre, pareva no schiecco de cristallo co le ccornice d’ebano, sagliette suso, e commenzanno a cercarele la capo, le mpizzaje no spingolone a la mammoria. Ma la Fata sentennose spertosare, gridaje palomma, palomma, e deventata na palommella, auzaje vuolo, e se mese a ffoire. La schiava spogliatose nuda, e fatto no fardiello de le stracce, e brenzole, che portava aduosso, le sbalanzaje no miglio da rasso, ed essa restata comme la fece la mamma ncoppa a chill’arvolo, pareva na statola d’acciavaccio drinto na casa de smeraudo. Fra chisto miezo tornato lo Prencepe co na gran cravaccata, e trovato na votte de Caviale, dove aveva lassato na tinella de latte, restaje pe no piezzo fore de sentemiento. A la fine disse: Chi ha fatto sto scacamarrone d’angresta a la carta riale, dove penzava scrivere li juorne mieje chiù ffelice? Chi ave aparato de lutto chella casa janchiata de frisco, dove credeva de pigliare li spasse mieje? Chi mme fa trovare sta preta paragone, dove aveva lassato na menera d’argiento pe fareme ricco, e biato. Ma la Schiava trottata, vedenno la maraveglia de lo Prencepe, disse; _No maravigliare, Principa mia, ca mi stare Ucciahè fatata fatta da fasce janca, cula nigra_. Lo Prencepe poverommo pocca lo male no avea remmedio, fatto corna comm’a boje se glioglette sto pinolo, e fatto scennere cargiumma, la vestette da capo a pede ncignannola nova, e ’nciricciannola tutta, ed annozzato, ngottato, ntorzato, ed ammussato, pigliaje lo cammino de lo pajese, dove da lo Rrè, e da la Regina, ch’erano sciute seje miglia da la terra a ncontrarelo, foro recevute co chillo gusto, che receve lo carcerato la ntemazione de lo decreto, che sospennatur, vedenno la bella prova fatta da lo figlio pazzo, ch’era juto tanto a tuorno pe trovare na janca palomma, e n’aveva carriato na negra cornacchia: tutta vota non potenno farene de manco, renonziata la corona a li Zite, mesero lo trepete d’oro ncoppa a chella facce de cravone. Ora mentre s’apparecchiavano feste spantose, e banchette de stordire, e li cuoche spennavano papare, scannavano porcelle, scortecavano crapette, lardiavano arruste, scommavano capune, e facevano mille autre muorze gliutte, venette a na fenestrella de la cocina na bella palomma, decenno:

_Cuoco de la cocina,_ _Che fa lo Rrè co la Saracina._

De la quale cosa lo Cuoco facette poco caso: ma tornato la palomma la seconna, e la terza vota a fare lo stisso, corze a direlo a la tavola pe cosa maravegliosa; e la signora sentuto sta museca, deze ordene, che subeto pigliata la palomma a lo stisso tiempo, nne fosse fatto no ngrattenato. Pe la quale cosa juto lo Cuoco, tanto fece, che la ncappaje, e fatto lo commannamiento de Cucoragnamma, ed avennola scaudata pe la spennare, jettaje chell’acqua, e chelle penne a n’arvaro fore no gaifo, dove non passattero tre juorne, che scette no bello pede de Citro, che cresciuto ’n quatto pizzeche, soccesse, che lo Rrè affacciatose a na fenestra, che responneva a chella parte, vedde st’arvolo, che n’avea visto ancora, e chiammato lo Cuoco, l’addemmannaje, quanno, e da chi era stato pastenato. E sentuto da mastro Cocchiarone tutto lo fatto, venne ’n sospetto de lo negozio; e accossì fece ordene sotto pena de la vita, che non se toccasse, anze fosse covernato cod ogne delegenzia. Ed essenno ’n capo de poche juorne spontate tre bellisseme Cetre, simmele a chelle, che le dette l’Orca cresciute, che foro, le fece cogliere, e nchiusose a na cammara co na gran tazza d’acqua, e co lo medesemo cortiello, che portava sempre appiso a llato, commenzaje a ttagliare, e soccedennole lo medesemo co la prima, e seconna Fata, comme l’autra vota l’era socciesso, utemamente, tagliaje lo tierzo Citro, e dato a bevere a la Fata, che nne scette, comme l’avea cercato, le restaje la giovene stessa, ch’avea lassato ncoppa all’arvolo, da la quale ’ntese tutto lo mmale fatto da la schiava. Ora chi pò dicere la manco parte de lo giubelo, che sentette lo Rrè de sta bona ventura, chi pò dicere lo gallejare, grilliare, gongolare, pampaniare, che fece, fa cunto, ca natava drinto lo ddoce, non capeva drinto la pella, se nne jeva ’n siecolo, e nzuoccolo: e fattale soppressa de le braccia, la fece vestire de tutto punto, e pigliannola pe la mano la portaje ’n miezo la sala, dov’erano tutte le ccortesciane, e le gente de la terra pe nnorare la festa, le quale chiammanno uno ped uno, le disse: Diciteme, chi facesse male a sta bella Segnora, che pena mmeretarria? a la quale cosa chi responneva, ca sarria mmeretevole de na collanna de cannavo; chi de na collazione de savorre; chi de no contrapunto co no maglio ncoppa la pellecchia de lo stommaco; chi de no sorzico de scamonèa; chi de no vranchiglio de na mazzara, e chi de na cosa, e chi de n’autra. All’utemo chiammanno la negra Regina, e facennole la stessa addemanna, respose: _Meritare abbrosciare, e porvere coppa Castiello jettare_. Sentuto chesto lo Rrè, le disse, tu t’aje dato l’accetta a lo pede, tu t’aje fravecato li cippe, ammolato lo cortiello, stemperato lo tuosseco, pocca nesciuno l’ha fatto cchiù male de te cana perra, cefutte. Saje tu ca chessa è cchella bella guagnastra, che tu spertosaste co lo spingolone? Saje ca chesta è la bella palomma, che faciste scannarozzare, e cocere a lo tiano. Che te pare Cecca de sso rozino, scotola, ca nn’è scesa. Aje fatto la bella cacca, chi fa male, male aspetta, chi cocina frasche, menestra fummo. Accossì decenno, la fece pigliare de pesole, e mettere viva viva drinto na gran catasta de legna, e fattone cennera, la sparpogliaro da coppa lo castiello a lo viento, facenno vero lo ditto a la fine,

_Non vaga scauzo, chi semmena spine._

SCOMPETURA DE LO CUNTO DE LI CUNTE

Pe chiudetura de la ’ntroduzzione de li Trattenemiente, che sarrà lo Trattenemiento X. de la Jornata Quinta.

_Conta Zoza la storia de li guaje suoje. La Schiava, che se sente toccare li taste fa fuorfece fuorfece, azzò no scompa lo Cunto. Ma lo Prencepe a dispietto sujo lo vò sentire, e scopierto lo trademiento de la mogliere, la fa morire prena, e bona, e se piglia Zoza._

_Stettero tutte a rrecchie pesole a ssentire lo Cunto de Ciommetella, e parte laudaro lo sapere, co che l’avea contato, parte nne mormoraro, tassannola de poco jodizio, che non doveva ’n presenzia de na Prencepessa schiava, spubrecare li vituperie de n’autra simmele, e decevano, che s’era posta a no gran riseco de sconcecare lo juoco. Ma Lucia fece veramente da Lucia, cernennose tutta, mentre se contava sto Cunto, che a l’arteteca de lo cuorpo se consideraje la borrasca, ch’aveva drinto a lo core, avenno visto drinto no Cunto de n’autra schiava lo retratto spiccecato de le mmarcancegne soje: ed averria fatto scacare subeto la scommerzione; ma parte perchè non se poteva spesare de li Cunte, tanto fuoco l’avea puosto ncuorpo la Pipata, comme l’attarantato non se pò spesare de li suone. E parte pe non dare materia a Taddeo de sospettare, se gliottette sto veluocciolo, co penziero de farene a tiempo, ed a luoco no buono resentemiento. Ma Taddeo che l’era trasuto ngrazia sto spassatiempo, azzennaje a Zoza, che decesse lo sujo, la quale fatto la crejanza soja, decette._