Part 14

Era na vota n’Ortolano, lo quale essenno poveriello poveriello, che pe quanto sudava a fatecare non poteva scire da pane a bennere, accattaje tre Porchette a ttre ffigliole femmene ch’aveva, azzò crescennole, se trovassero quarcosa pe ddotecella. Pascuzza, e Ccice, ch’erano le chiù granne, portaro a pascere le lloro a no bello pascone, ma non vozero, che Parmetella, ch’era la figliola cchiù ppiccola, jesse co lloro, cacciannola, azzò jesse a ppascere a quarc’autra parte, la quale portanno l’animaluccio sujo pe drinto no Vosco, dove se facevano forte l’ombre contro l’assaute de lo Sole, ed arrevata a no certo pascolo ’n miezo a lo quale correva na Fontana, che comm’a Tavernara d’acqua fresca, ’nvitava co llengua d’argiento li Passaggiere a bevere na meza, trovaje no cierto Arvolo co le ffrunne d’Oro, de le quale pigliatone una la portaje a lo Patre che con allegrezza granne la vendette cchiù de vinte docate, che le vastaro ad appilare quarche pertuso, e demannata dove l’avesse trovata, disse, piglia Messere mio, e non cercare autro, si non vuoje guastare la sciorta toja; e ttornato lo juorno appriesso fece lo medesemo, e tanto continuaje a sfronnare chill’Arvolo, che restaje spennato comme si avesse receputo lo sacco da li viente passato l’autunno; e addonatose ca st’Arvolo aveva no gran Turzo d’Oro, lo quale non se poteva sciccare co le mmano, jette a la casa soja, e ttornata co n’accetta se pose a scauzare ntuorno lo pedale dell’Arvolo, e auzato comme meglio potte lo Turzo, nce trovaje sotto na bella Scala de porfeto, pe la quale essa, ch’era curiosa fore de mesura, scennette a bascio, e cammenato pe na gran cava futa futa, trovaje na bella chianura, nne la quale era no bellissemo Palazzo, che no scarpisava autro, ch’Oro, ed Argiento, nne te deva autro ’n facce, che pperne, e pprete preziose. E mmiranno Parmetella, comme nsallanuta sti belle sfuorgie, nè bedenno perzona nesciuna mobele drinto accossì bello stabele, trasette drinto na Cammara, dov’era na mano de quatre, nne li quale se vedevano pente tanta belle cose, e particolaremente la ngnoranzia de n’ommo stimato sapio, la ngiustizia de chi teneva le balanze, e l’aggravie vennecate da lo Cielo, cose da fare strasecolare, accossì parevano vere, e bive, drinto la quale Cammara trovaje na bella tavola apparecchiata. Parmetella, che se senteva sonare le stentine, non bedenno perzona nesciuna, se mese a ttavola comm’a no bello Conte a smorfire; ma stanno a lo mmeglio de lo mmazzecare, eccote trasire no bello schiavo, lo quale disse: Ferma non te partire, ca te voglio pe mmogliere, e ffarete la cchiù felice femmena de lo Munno. Parmetella, si bè filaje sottile pe la paura, tutta vota a sta bona prommessa pigliaje core, e ccontentatose de chello, che boze lo Schiavo, le fu subeto consegnata na Carrozza de Diamante tirata da quattro Cavalle d’Oro, co l’Ascelle de smeraude, e rrobine, che la portavano volanno ped’ajero, azzò se pigliasse spasso, e le foro date pe servizio de la perzona soja na mano de scigne vestute de tela d’oro, che ssubeto ncignannola da capo a pede, la mesero nforma de ragno, che ppareva propio na Regina. Ma venuta la notte, quanno lo Sole desideruso de dormire a le rripe de lo Sciummo dell’Innia senza tavane, stuta lo lumme, lo Schiavo le disse, bene mio si vuoje fare la nonna, corcate a sto lietto; ma comme si ncaforchiata drinto a le llenzola, stuta la cannela, e stà ’n cellevriello a ffare chello che te dico, si non vuoje sgarrare lo ffilato. Le quale cose fatte Parmetella, se mese a dormire: ma non appe accossì priesto appapagnato l’uocchie, che lo Cargiumma, deventato no bellissimo Giovene, se le corcaje allato, ed essa scetatose, e ssentennose cardare senza pettenà la lana, appe a mmorire atterruta, ma visto, che la cosa se rreduceva a guerra cevile, stette ferma a le botte: ma nnanze che scesse l’Arba a ccercare ova fresche pe cconfortare lo vecchiariello nammorato sujo, lo Schiavo sautaje da lo lietto, e ttornaje a rrepegliare la petena soja, lassanno Parmetella assaje goliosa de sapere quale cannaruto s’aveva sorchiato l’uovo primmarulo de cossì bella Pollanca. Ma juta l’autra notte, e ccorcatose, e stutate le ccannele, comme aveva fatto la sera nnante, ecco se ne venne a lo ssoleto lo bello Giovene a ccorcarese allato, lo quale dopo che fu stracco de jocoliare, essennose puosto a ddormire, essa deze de mano a no focile, che s’aveva apparecchiato, e allummato l’esca, dette a lo zorfariello, e appicciato la cannela auzaje la coperta, e bedde l’ebano tornato avolio, lo caviale latte, e nnatte, e lo cravone, cauce vergene, a le quale bellezze stanno a ccanna aperta a ttenere mente, e contempranno la cchiù bella pennellata, ch’avesse dato maje la natura ncoppa la tela de la meraveglia, scetatose lo Giovene, commenzaje a ghiastemmare Parmetella decenno, oimè ca pe ccausa toja aggio da stare sette autre anne a sta penetenzia mmardetta: mentre co ttanta curiositate aje voluto dare de naso a li secrete mieje, ma và curre, scapizzate, che non puozze parere, e ttorna le ppettolelle, pocca n’aje conosciuto la sciorte toja. Accossì decenno, squagliaje comm’argiento vivo. La negra, fredda, e ghielata vascianno da capo ’n terra, scette da chella casa, e comme fu arrevata fora la grotta, scontraje na Fata, che le disse: O figlia mia, quanto mme chiagne l’arma de la desgrazia toja: tu vaje a lo Maciello, dove passaraje pe lo Ponte de lo capillo sta negra perzona: perzò pe arremediare a lo pericolo tujo, piglia ste ssette fusa co ste ssette fico, e co st’arvariello de mele, e ste ssette para de scarpe de fierro, e cammina tanto senza fermarete maje, ficche se strudono, che vederraje ncoppa a no gaiso de na casa sette femmene, che starranno a filare da sopra a bascio co lo ffilo arravogliato all’ossa de muorte, e tu fa, che buoje fare? statte bello accovata, e guatto guatto, comme scenne a bascio lo filo, e tu levane l’uosso, e attaccance lo fuso ontato de mele co la fico ncagno de vertecillo; perchè terannole ad auto, e sentenno lo ddoce, derranno: Chi m’ave addociuto la mia voccuccia, le sia addociuta la soja ventoruccia; e dapò ste parole una appriesso l’autra derranno: O tu che m’aje portato ste cose dduce, lassate vedere: e tu responnarraje: non voglio, ca mme mance; e chelle dirranno: non te magno, se Dio mme guarda la Cocchiara: e tu mponta li piede, e stà tosta; e esse secotarranno: io non te mancio, se Dio mme guarda lo spito; e tu sauda, comme te radisse; ed esse leprecarranno: Io non te magno, se Ddio mme guarda la Scopa; e tu no le ccredere zubba; e si decesse: non te magno se lo Cielo mme guarde lo cantaro; tu te chiude la vocca, e non pipetare, ca te farriano vacoare la vita. All’utemo dirranno: se Dio mme guarde Truono, e llampe ca non te mancio, tanno tu saglie ad auto, e tremma secura, ca non te farranno male. Ntiso chesto Parmetella, commenzaje a ccammenare pe valle, e pe munte, tanto che le scarpe de fierro ’n capo de sett’anne se strudettero. E arrivata a no gran casone, dov’era na loggetta sciuta ’n fore, vedde le sette femmene, che felavano, e fatto chello, che l’aveva conzigliato la Fata, dapò mille guattarelle, e ccovarelle, essa all’utemo, fatto lo joramiento de Truone, e llampe, fattose vedere, sagliette ad auto, dove tutte sette le decettero: O cana tradetora, tu si la causa, che fratemo sia stato sette, e sette anne drinto la grotta lontano da nuje, ’n forma de schiavo; ma non te corare ca se aje saputo farence co lo joramiento no sequestro a la canna, co la primma accasione scunte lo nnuovo, e lo biecchio. Ora saje che buoje fare, accovate dereto a chella martora, e comme vene mamma nostra, la quale senz’autro te nnorcarria, tu levate retomano, e afferrale le zizze, che le ttene comm’a bisaccia dereto le spalle, e ttira quato puoje, nè lassare maje, ficche non jura pe Truone, e lampe de non farete male. La quale cosa fatta da Parmetella, dapò avere jurato pe la paletta de lo fuoco, pe lo preolillo, pe lo pagese, pe lo trapanaturo, pe la rastellera, joraje pe Truone, e llampe, ed essa lassaje le zizze, e se fece vedere all’Orca, la quale le disse: ajeme no cauce: ma sorca deritto, tradetora, ca co la primma chioppeta te ne faccio portare a la lava, e cercanno co le sproccole l’occasione de scrofoniaresella, no juorno pigliaje dudece sacche de legumme confuse, e le mmescolaje nsiemme, ch’erano cicere, cicerchie, pesielle, nemmicole, fasule, fave, rise, e lopine, e le disse: Tradetora te, piglia sti legumme, e scigliele de manera, che ogni una stia separata dall’autra, che se pe sta sera non so fatte, io me te nnorco comm’a zeppola de tre ccalle. La povera Parmetella sedutase a pede li sacche, deceva chiagnenno: mamma mia bella, o quanto mme sarrà ntorzato lo turzo d’oro, chesta è la vota, che sarrà speduto lo chiajeto mio, pe bedere na facce negra tornata janca, sto core negrecato è tornato mappina. Oimè, so fonsa, so speduta, non c’è cchiù remmedio: mme pare ad ora ad ora de nchire lo cannarone de chella Orca fetente; non c’è chi m’ajuta, non c’è chi mme conziglia, ne nc’è chi mme conzola: ora mentre faceva lo sciglio, eccote comparere comm’a no lampo, Truono e llampe, lo quale aveva fornuto l’asilio de la mmardezzione, che le fu data, lo quale si bè steva ncagnato co Parmetella, puro lo sango non poteva farese acqua, e bedennole fare sto sciabbacco, le disse: Tradetora, che d’aje, che chiagne? ed essa le contaje lo male trattamiento de la mamma, e lo fine sujo, che era de cacciarene li picciole, e nnorcaresella: a la quale respose Truone, e llampe: susete, e piglia core, ca non sarrà quanto se dice, e tutto a no tiempo sparpoglianno tutte le legumme pe tterra, fece nascere lo delluvio de formiche, le quale subeto commenzaro ad ammontare spartatamente tutte le llegumme; tanto che Parmetella recoglienno ogn’una da simmeto, nne nchiette li sacche, e benuta l’Orca, e trovato lo servizio fatto, s’appe a ddesperare, decenno; chillo cane de Truone, e llampe m’ha fatto sto bello servizio: Ma tu mme pagarraje lo sfriddo; e perzò piglia ste ffacce de cocetrigno, che songo pe dudece matarazze, e fa che pe sta sera siano chine de penne, autramente nne faccio la chianca. La negra pigliatose le ffacce de li matarazze, e ssedutose ’n terra, commenzaje a ffare autro che rriepeto, martoriannose tutta, e facenno doje fontane dall’uocchie, quanno comparse Truone, e llampe, e le disse: Non chiagnere tradetora, lassa fare a sto fusto, ca te caccio a puorto, perzò scapillate sta capo, spanne le ffacce de li matarazze ’n terra, e commenza a chiagnere, e a ttrevoliare, strillanno, ch’è muorto lo Rrè dell’Aucielle, e bide che ne soccede. Accossì fece Parmetella, ed ecco na nuvola d’Aucielle, che scorava l’ajero, li quale sbattenno l’ascelle facevano cadere a ccuofano a ccuofano le ppenne, tanto che ’n manco termene de n’ora, foro chine li matarazze, e benuta l’Orca, e bisto lo fatto, ’ntorzaje de manera, che schiattava pe li schianche, decenno: Truone, e llampe m’ha pigliato a frusciare, ma sia strascinata a ccoda de Scigna, s’io non la coglio a passo, dove non pozza scappare, accossì decenno, disse a Parmetella: Curre, vrocciola a la Casa de Sorema, e dì che mme manne li suone, perchè aggio nzorato Truone, e llampe, e bolimmo fare na festa de Rrè; dall’autra parte mannaje a ddicere a la sore, che benenno la tradetora a cercare li suone, l’accedesse subeto, e la cocenasse, ca sarria venuta a mmagnare nsiemme cod’essa. Parmetella, che se vedette commannare servizie cchiù liegge, se rallegraje tutta, credennose, che fosse commenzato ad addocirese lo tiempo. O quanto songo stuorte li jodizie omane! Ma trovato pe la strata Truone, e llampe, vedennola ire de buon passo, le decette: dove si abbiata, scura tene? non vide ca vaje a la Chianca, e te fraveche da te li cippe, t’ammuole tu stessa lo cortiello, tu stessa te stiempere lo benino, ca si mannata all’Orca, perchè te gliotta. Ma siente, e non dobetare, pigliate sta panella, sto mazzo de fieno, e sta preta, e comme arrivarraje a la casa de Ziama, vì ca truove no cane corzo, lo quale venerrà abbajanno pe mozzecarete, e tu dalle sta panella, ca l’appile la canna; passato lo Cane, trovarraje no Cavallo scapolo, che benarrà pe ddarete a ccauce, e scarpisarete, e tu dalle lo fieno, ca le mpasture li piede: all’utemo trovarraje na porta, che sempre sbatte, e tu pontellala co sta preta ca le lieve la furia; saglie po ad auto, ca truove ll’Orca co na peccerella ’n braccio, ch’ave allommato no furno pe te nce arrostere, la quale te dirrà, tiene sta criatura, e aspetta quanto vao fuso a pigliare li Suone; ma sacce ca se và ammolare le zanne pe te squartare a ppiezze a ppiezze, e tu jettanno la fegliola drinto a lo furno senza pietà, ca è ccarne d’Orca, pigliate li suone, che stanno dereto la porta, e sbigna fore, nnante che torna l’Orca, ca si no si speduta. Ma avierte ca stanno drinto na scatola, la quale non aprire, si non vuoje avere guaje, e ccatalaje; e fatto Parmetella quanto le consigliaje lo nnamorato, a lo ttornare, che facette co li suone aperze la scatola, e lloco te vediste volare da ccà no frauto, da llà na ciaramella, da na parte na Zampogna, dell’autra no chiuchiaro, facenno pe l’ajero mille sciorte de suone, e Parmetella appriesso sciccannose tutta la facce. Fra chisto miezo scette l’Orca, e non trovanno Parmetella s’affacciaje a na fenestra gredanno a la porta, scamazza sta tradetora, e la porta respose, non voglio fare male a la sbentorata, che m’ave pontellata; e l’Orca gridaje a lo Cavallo, scarpisa sta malantrina; e lo Cavallo respose, no la voglio scarpisare, ca m’ha dato lo fieno a rrosecare; e l’Orca chiammaje finalemente lo Cane decenno: mozzeca sta vigliacca, e lo cane respose: lassala ire la poverella, ca m’ha dato la panella. Ora mo Parmetella, che ghieva voceteianno dereto di suone, scontraje Truone, e llampe, lo quale le fece na bona nfrosoliata, decenno: O tradetora, non vuoje propio mmezzare a spese toje, che pe sta mmardetta curiosetà si a lo stato dove te truove? Accossì decenno, chiammaje a fisco li suone, e le tornaje a nchiudere a la scatola, decennole che le portasse a la mamma, la quale comme la vedde, gridaje ad auta voce: O sciorte crodele, perzì Sorema m’è contraria, che non m’ha voluto dare sto contiento. Venette fra sto tiempo la Zita novella, che era na brutta peste, na gliannola, n’arpaja, malombra, na soreca mossuta, cefescola, votta-crepata, tutta teseca, che co cciento sciure, e ffrascune pareva taverna aperta de nuovo, a la quale la sogra fece no gran banchetto; e perchè avea male fele, fece apparecchiare la tavola vicino a no puzzo, dove mese le sette figlie co na ntorcia peduno ’n mano, dannone doje a Parmetella, facennola sedere ncoppa l’urlo de lo puzzo, co designo, che benennole suonno tommoliasse a bascio. Ora mentre lo mmagnare jeva, e beneva, e commenzavano a scaudarese li sanghe, Truone, e llampe, che steva comm’a la Zita, che male nce venne, disse a Parmetella: O tradetora, mme vuoje bene? e essa respose, fin coppa all’astreco; e chillo leprecaje: si mme vuoje bene, damme no vaso; e essa, Ddio me ne scanze, arrasso sia, bona rrobba, che te canta appriesso: lo Cielo te la mantenga da ccà a cient’anne, co ssanetate, e figlie mascole: e la Zita respose, ben se pare ca si na sciaurata si campasse cient’anne, che ffaje la schifosa de vasare no Giovane accossì bello: ed io pe ddoje castagne mme lassaje vasare a ppezzichille da no pecoraro. Lo Zito, che sentette sta bella prova, fece bottune, e ntorzaje comm’a rruospo, tanto che se l’annozzaje lo mmangiare ’n canna: tutta vota fece della trippa corazzone, e gliottette sto pinolo co penziero de fare appriesso li cunte, e ssaudare sta partita. Ma levato le ttavole, nne mannaje la Mamma, e la Ssore, ed isso la Zita, e Parmetella restaro nsieme pe ghirese a corcare; e mmentre se faceva scauzare da Parmetella, disse a la Zita; Mogliere mia, aje vista comme sta spurceta m’ha negato no vaso? ave avuto tuorto, respose la Zita, a darese pede arreto de vasarete, essenno tu accossì bello giovene; mentre io pe ddoje castagne mme fice vasare da no guarda-pecore. Non potte cchiù contenerese Truone, e llampe, ma co llampe de sdigno, e ttruone de fatte, sagliutole la mostarda a lo naso, mese mano a no cortiello, e scannarozzaje la Zita, e ffattole no fuosso a la Cantina, l’atterraje; ed abbraccianno Parmetella, le disse: tu sì la gioja mia: tu lo sciore de le ffemmene, lo schiecco de le nnorate, e perzò votame ss’uocchie, damme ssa mano, stienne sso musso, nzeccate core, ca voglio essere lo tujo mentre lo munno è mmunno. Accossì decenno, se corcattero, e stettero gaudenno fiche lo Sole le levaje li cavalle de fuoco da la stalla d’acqua, e li cacciaje a ppascere per li campe semmenate da l’Aurora: quanno venuta ll’Orca co ll’ova fresche pe confortare le Zite, azzò decesse; viato che se nzora, e piglia Sogra, trovaje Parmetella abbracciata co lo figlio, e ntiso lo negozio comme era passato, corze de ponta da la Sore pe conzertare lo muodo de levarese da nante sto spruoccolo dell’uocchie suoje, senza che lo Figlio la potesse ajutare, e ttrovato, che pe ddolore de la figlia cotta a lo furno s’era nfornata essa perzì, che lo fieto d’arzo ammorbava tutto lo vecenato, tanto fu la disperazione soja, che da Orca deventato montone, tanto tozzaje la capo pe le mmure, che le sghizzaro le cellevrella, e Ttruone, e llampe fatto fare pace a Parmetella co le ccainate, stettero felice, e contiente: trovanno vero lo Mutto,

_Ca chi la dura la vence._

SOLE, LUNA E TALIA.

TRATTENEMIENTO V De la Jornata V.

_Talia morta pe n’Aresta de lino, è llassata a no palazzo, dove capitato no Rrè nce fa duje figlie, la mogliere gelosa l’ave ’n mano, e commanna, che li figlie siano date a mmangiare cuotte a lo patre, e Ttalia sia abbrusciata; lo cuoco sarva li figlie, e Ttalia è lliberata da lo Rre, facenno jettare la mogliere a lo stisso fuoco apparecchiato pe Ttalia._

_Dove lo caso dell’Orche poteva portare quarche frecola de compassione, addusse causa de gusto, rallegrannose ogn’uno, che le ccose de Parmetella fossero resciute assaje meglio de chello, che se penzava, dopo lo quale Cunto toccanno a Popa de ragionare, essa che stava co li piede a le staffa, accossì decette._

È cosa sprementata, ca pe lo cchiù la crodeletate serve pe Boja a chillo stisso, che l’aserzeta; ne s’è bisto maje, che chi sputa ’n cielo no le torna ’n facce. E lo revierzo po de sta medaglia, la ’nnocenzia è no brocchiero de fico, dove se spezza, o nce resta la ponta d’ogne spata de malegnetate de muodo, e de manera, che quanno no poverommo se crede muorto, e ssepelluto, tanno se vede resorzetato ’n carne, e ’nn ossa, comme sentarrite ne lo Cunto, che da la votta de la mammoria co la vergara de sta lengua songo pe be spinolare.