Part 16

Era na vota no buon ommo da bene chiammato Pacione, lo quale aveva cinco figlie accossì da poco, che n’erano buone pe nniente, tale che lo povero patre non potenno cchiù ffarele le spese, se resorvette no juorno de levareselle da cuollo decennole; figlie mieje, Dio sà, s’io ve voglio bene, che all’utemo site scite da li rine mieje, ma s’io sò biecchio, che ffatico poco, vuje site giuvane, che manciate troppo, nè pozzo cchiù campare, comme faceva primmo: ogne ommo pe se, e lo Cielo pe tutte: perzò jattevenne ad abbuscare patrune, e mparate quarche servizio: ma avvertite de non accordareve pe cchiù ttiempo de n’anno, e scomputo sto termene, v’aspetto a la casa co quarche bertute. Li figlie ntiso sta resolozione, pigliattero lecienzia, e portatose quatto straccie da mutarese, se nne pigliaro la via ogn’uno pe la strata soja, cercanno la ventura, e ’n capo dell’anno, comm’era l’appontamiento, se trovaro tutte a la casa de lo patre, dove foro recettate co gran carizze, e fatto subeto apparecchiare la tavola; perchè erano stracche, ed allentate, le ffece sedere a mmagnare, e stanno a lo mmeglio de lo mmagnare, se sentette cantare n’auciello, pe la quale cosa lo figliuolo cchiù ppiccolo de li cinco s’auzaje da tavola, e ghiette fora ad ausoliare; e comme fu tornato, s’era levato lo mesale; e Pacione accommenzaje a demmannare a li figlie: ora bè conzolateme no poco sto core, e ssentimmo che belle vertute avite fra sto tiempo mparate; e Lluccio, ch’era lo primmo disse, m’aggio nvezzato l’arte de mariuolo, dove sò deventato lo protoquanqua de li furbe, lo capo-mastro de li latre, lo quarto de ll’arte de li marranchine, e non trova lo paro de sto fusto, che co cchiù ddestrezza faccio azzimmare, e cottejare farrajuole, arravogliare, e scervecchiare colate, granciare, e alleggerire saccocciole, arresediare, ed annettare poteche, scotolare, e zeppoliare vorzille, scopare, e devacare cascie, che dovonca arrivo, te faccio vedere meracole a mmenare de grancio. Bravo affè, respose lo patre, tu aje mparata n’arte de mercante a ffare cambio de contrapunte de deta, co rrecevute de spalle, votate de chiave co bottate de rimmo, e scalate de finestra, co colate de funa; maro me, meglio t’avisse nvezzato de votare no filatorio, che non mme farrisse votare comm’a ffilatorio sto cuorpo, parennome ’n ora de vederete ’n miezo la corte co no coppetiello de carta, o scopierto a rramma, esserete consignato no rimmo, o se chisto scappe, a la fine vederete dare vota co na funa. Accossì ditto se votaje a Ttitillo, ch’era lo secunno figlio, e disse: E tu, che bell’arte averraje mparato? De fare varche, respose lo figlio. Manco male, leprecaje lo patre, ca chessa è n’arte nnorata, e nce puoje campare la vita. E tu Renzone, che saje fare ’n capo de tanto tiempo? saccio, disse lo figlio, terare accossì dritto de valestra, che caccio n’uocchio a no gallo. Puro è quarcosa, disse lo Patre, ca puoje scampoliare co la caccia, e procacciare lo ppane; e botatose a lo quarto, l’addemmannaje lo stisso; e Ghiacuccio, io saccio canoscere n’erva, che rresusceta no muorto. Bravo, previta de Lanfusa, respose Pacione, chessa è la vota che nce levarrimmo da meseria, e farrimmo campare le gente cchiù de lo Verlascio de Capua. Ed addemmannato ped’utemo all’utemo figlio, ch’era Menecuccio, che ccosa sapesse fare? disse: Io saccio ntennere lo pparlare de l’aucielle. Non senza che, leprecaje lo patre, mentre stevamo a ttavola, te susiste pe ssentire lo bernolejare de chillo passaro: ma pocca te vante de ntennere chello, che diceno, dimme che cosa aje ntiso dire da chillo Auciello, che steva ncoppa a ll’arvolo. Diceva, respose Menecuccio, ca n’Uorco ave arrobbato la figlia de lo Rrè d’Autoguorfo, e portatola ncoppa a no scuoglio, dove non se ne pò sapere nè nnova, nè becchia, e lo patre ha fatto jettare no banno, che chi la trova, e le porta la figlia, nce la darrà pe mmogliere. S’è cchesto, nuje simmo ricche, auzaje voce Luccio, perchè mme vasta l’armo de levarela da mano all’Uorco. Se te confide de farelo, soggionse lo viecchio, jammoncenne a sta medesema pedata a lo Rrè, e puro che nce dia parola d’attennere la promessa, afferimmole de trovarele la figlia. Cossì accordatose tutte, Titillo fece subbeto na bella varca, dove puostose drinto, fece vela, e passaje ad Auto-guorfo, dove fattose dare audienzia da lo Rrè, e affertose de recuperare la figlia, appero nove conferme de la promessa; pe la quale cosa passattero a lo scuoglio, dove pe bona fortuna trovato ll’Uorco, che sciuto a lo Sole, dormeva co la capo nsino la figlia de lo Rrè, che se chiammava Cianna, la quale comme vedde venire sta varca se voze auzare pe lo piacere, ma fattole zinno Pacione, che stesse zitto, e puosto no gran pretone sotto la capo de l’Uorco, fecero sosire Cianna, e puostese drinto la varca, commenzaro a dare de palelle all’acqua, ma non foro troppo allargate da lo lito, che l’Uorco scetatose, e non ttrovannose a ccanto Cianna, calaje l’uocchie a la marina, e bedde la varca, che nne la portava, pe la quale cosa cagnatose subeto a na negra nuvola, corze pe l’ajero ad arrevare la varca. Cianna, che sapeva l’arte de l’Uorco, conoscette ca venea ncaforchiato drinto a la nuvola, e fu tanta la paura soja, ch’appena potenno avisare Pacione, e li figlie, morette spantecata. Renzone, che bedde abbicinare na nuvola, dato de mano a na valestra, cecaje deritto l’uocchie dell’Uorco, che pe lo spasemo cadette da drinto, commo a grannano, tuppete a bascio, e dapò d’essere stato tutte sbaottute co l’uocchie fitte a la nuvola, votannose drinto la varca a bedere, che faceva Cianna, la veddero stennecchiata li piede, e ghiuta fora da lo trucco de la vita, la quale cosa vedenno Pacione, commenzaje a sciccarese la varva, decenno: Eccote perduto l’uoglio, e lo suonno; eccote jettato le ffatiche a lo viento, e le speranze a lo maro, pocca chessa è ghiuta a pascere pe ffarece morire de famme. Chessa ha ditto bona notte, pe ffarece avere lo male juorno, chessa ha rutto lo filo vetale, pe ffare che tutte rompimmo lo filaccione de le speranze nostre. Ben se vede, ca designo de poverommo maje non resce; ben se prova ca chi nasce sbenturato, more nfelice; eccote leberata la figlia de lo Rrè: eccote tornare ad Auto-guorfo, eccote avuta la mogliere, eccote fatto feste vannute, eccote avuto lo scetro, eccote schiaffato de culo ’n terra. Jacuccio stette a sentire sto sciabbacco, all’utemo vedenno ca durava troppo sta canzona, e ca se ne jeva sopra lo liùto de lo dolore, contrapuntianno pe fi a la rosa, le disse: Chiano, messere, ca nuje volimmo ire ad Auto-guorfo, e stare cchiù felice, e conzolate de chillo, che tu te cride. Tale conzolazione pozza avere lo gran Turco, respose Pacione, ca commo portammo sto catavero a lo patre nce ne farà contare, ma non denare; e dove aute co na veleata hanno passato felicemente sto guorfo, nuje ce perdarrimmo lo ngorfire. Zitto, leprecaje Jacuccio, e dove aje mannato lo cellevriello a pascere? non te allecuorde l’arte ch’aggio mparata, smontammo ’n terra, e lasseme cercare l’erva, che tengo a sto cellevriello, e bedarraje autro, che fruscole. Lo Patre a ste parole piglianno spireto, l’abbracciaje, e comme era strappato da lo desederio, accossì deva strappate a lo rimmo, tanto che fra poco tiempo arrivaro a la marina d’Auto guorfo, dove sciso Jacuccio, e trovato l’erva, corze arreto a la varca, e spremmuto zuco ’n vocca a Cianna, subbeto comme a rranonchia, ch’è stata drinto la grotta de li cane, e po se jetta a lo lago d’Agnano, deventaje viva, pe la quale cosa co allegrezza granne jettero a lo Rrè, lo quale non se saziaje d’abbracciare, e de vasare la figlia, e de rengraziare ste perzone, che nce l’avevano recoperata. Ma essennole fatta stanzia, ch’attennesse la promessa, disse lo Rrè: A quale de vuje aggio da dare Cianna? chisto non è mmigliaccio, che se pozza spartire a ffella, perzò è fforza, che ad uno tocca la fava de la copeta, e l’autre se pigliano no palicco. Respose lo primmo, ch’era arcivo, Segnore lo premmio ave da essere secunno la fatica, perzò vedite chi cchiù s’ha guadagnato sto bello voccone, e po facite la jostizia, che se commene. Tu parle da Orlanno, respose lo Rrè, perzò contate chello, ch’avite fatto, azzò io non vea stuorto pe ghiodecare deritto. Contato ogn’uno le pprove soje, se votaje a Pacione, e le disse; e tu che nce aje fatto a sto servizio? mme pare de nce avere fatto assaje, leprecaje Pacione, pocca aggio fatto uommene sti figlie mieje, ed a forza de pecune l’aggio fatto mparare l’arte, che ssanno, ca si no sarriano tanta cestune, dove mo fanno accossì belle frutte. Lo Rrè sentuto l’una parte, e ll’autra, e mmazzecato, e rrummenato le rragiune de chisto, e de chillo, e bisto, e conzederato chello, che ghieva justo, settenzaje, che Cianna fosse de Pacione, commo primmo origene de la salute de la figlia. Accossì fu fatto, e li figlie avuto na maniata de tornise, che se le mettessero ’n guadagno, lo Patre pe l’allegrezza tornaje commo a figliulo de quinnece anne, e le venne a cola lo Proverbio,

_Che fra duje litecante_ _Sempre lo tierzo gaude._

NENNILLO, E NENNELLA.

TRATTENEMIENTO VIII De la Jornata V.

_Jannuccio ha duje figlie de la primma mogliere, se nzora la seconna vota, e songo tanto odiate da la matrea, che le porta a no vosco, dove sperduto l’uno da l’autro, Nennillo deventa caro Cortisciano de no Prencepe, e Nennella jettannose a mmaro, è gliottuta da no Pesce fatato, e ghiettato sopra no scuoglio è da lo fratiello reconosciuta, e da lo Prencepe mmaritata ricca ricca._

_Fremmata la carrera Ciulla, se mese ’n punto de correre sto palio Paola, e dapò d’esserese spurgata la voce co na bella rascata, e annettatose lo musso co no moccaturo nuovo de lino, e cannavo, accossì dette prenzipio._

Negrecato chill’ommo, che avenno figlie, spera de trovarele covierno co darele Matreja, pocca le porta a la casa la machena de le rruine lloro, non essennose visto maje matreja, che mmirasse de buon uocchio le rrazze d’autro, e se puro, se n’è trovata quarc’una de desgrazia, se pò mettere lo spruoccolo a lo pertuso, e se pò dire, che sia stato Cuorvo janco; ma io fra tante, che fuorze nn’averrite sentuto mentovare, ve parlaraggio d’una, che se pò mettere a la lista de le mmatreje scoscenziate, la quale stimmarrite degna de la pena, che se comperaje a denare contante.

Era na vota no patre chiammato Jannuccio, ch’avea duje figlie, Nennillo, e Nennella; a li quale voleva bene quanto a le bisole soje; ma avenno la morte co la limma-sorda de lo tiempo rotte le ferriate de la presonia de ll’arma de la mogliere, se pigliaje na brutta scerpia, ch’era na Canesca mmardetta, che non accossì priesto appe misso lo pede a la casa de lo marito, che accommenzaje ad essere cavallo de na stalla, e a dicere, che sò benuta a spedocchiare li figlie d’autre? chesto mme mancava mo de pigliareme sto mpaccio d’autre, e bedereme ntuorno ste rregnole, che nnanze mme fosse rotta la noce de lo cuollo, che benire a sto nfierno pe mmale magnare, peo vevere, e peo dormire pe lo fastidio de sti cacate, chesta n’è bita da zoffrire, so benuta pe mmogliere, non pe bajassa, besogna pegliarence spediente, e trovare recapeto pe ste pitteme, o mme trovo recapeto pe mme stessa, e mmeglio na vota arrossire, che ciento palledire, mo sparentammo pe sempre; che so resoluta propio de vederene lo costrutto o rompere ’n tutto, e pe tutto. Lo nigro marito avenno puosto no poco d’affezzione a sta femmena, le disse: Senza collera, mogliere mia, ca lo zuccaro vale caro: ca craje matino nnanze, che ccanta lo Gallo te levarraggio sto trivolo, pe tenerete contenta; e accossì la matina appriesso nnanze che l’Arba spannesse la coperta de Spagna rossa pe scotolare li pulice a la fenestra d’Oriente, isso pigliatose li figlie uno pe mano, co no buono panaro de cose da magnare nfilato a lo vraccio, le pportaje a no vosco, dove n’aserzeto de chiuppe, e de faje tenevano assediate l’ombre; a lo quale luoco arrivato, disse Jannuccio: Nennille mieje, stateve ccà drinto, manciate, e bevite allegramente, e comme ve manca niente, vedite sta lista de cennere, che vao semmenanno, che sarrà lo filo, che cacciannove da lo laborinto, ve portarrà a piede fitto a la casa vostra, e datole no vaso ped’uno, se nne tornaje chiagnenno a la casa. Ma comme tutte l’anemale zitate da li sbirre de la notte pagano lo cienzo a la natura de lo necessario arrepuoso, li Nennille, o fosse la paura de stare a chillo luoco jeremo, dove l’acque de no sciummo, che mmazziava le pprete mpertenente, che se le paravano nnante le piede, averria fatto sorrejere no Rodomonte, s’abbiaro chiano chiano pe chella stratella de cennere, ed era già meza notte quanno adasillo adasillo arrivaro a la casa, dove Pascozza la matreja, non fece cosa de femmena, ma de furia nfernale, auzanno li strille a lo Cielo, sbattenno mano, e piede, e sbruffanno comm’a ccavallo adombrato, decenno; che bella cosa è chesta? dove so sguigliate sti zaccare, e sti peccenache? è possibele, che non ce sia argiento vivo da scrastarele da sta casa? è possibele, che nce le buoglie tenere pe ccrepantiglia de sto core? Và levamette mo propio da nante l’uocchie, ca non voglio aspettare nè mmuseca de Galle, nè ttrivole de Galline, si nò, te puoje spezzolare li dente, ch’io dorma co ttico, e craje matino mme ne la sfilo a la casa de li pariente mieje, ca tu non mme mmierete, e puro t’aggio portato tante belle mobele a sta casa, pe bedere le ccacate, e lo fieto de li cule d’autre, nè aggio dato accossì bona dote pe essere schiava a li figlie, che non so mieje. Lo sfortunato Jannuccio, che bedde la varca male abbiata, e la cosa pigliare troppo de caudo, a lo stisso momento se pigliaje le ppeccerelle, e tornato a lo vosco, dove dato n’autro panariello de coselle da mangiare a li figlie, le disse: Vuje vedite, bene mio, quanto ve tene nsavuorrio chella cana de moglierema, venuta a la casa mia pe rroina vostra, e pe cchiuovo de sto core; perzò statevenne a sto vosco, dove l’arvole cchiù pietuse ve farranno pennata contra lo Sole, dove lo sciummo cchiù caritativo, ve darrà da vevere senza tuossoco, e la terra cchiù ccortese ve darrà saccune d’erva senza pericolo, e quanno ve mancarrà lo mazzeco, io ve faccio sta viella de vrenna deritta deritta, pe la quale ve porrite venire a cercare soccurzo, e accossì ditto votaje la facce dall’autra parte pe non se fare a bedere chiagnere, e levare d’armo li povere Zaccarielle, li quale pocca s’appero mangiato la rrobba de lo panariello, vozero tornare a la casa; ma perchè n’aseno figlio de la mala fortuna s’aveva annorcato la vrenna sparpogliata pe tterra, sgarraro la strata, tanto che ghiettero na mano de juorne spierte pe drinto lo vosco, pascennose de gliantre, e castagne, che trovaro cadute ’n terra. Ma perchè lo Cielo tene sempre la mano soja ncoppa li nnoziente, venne pe bentura no Prencepe a caccia drinto a chillo vosco, e Nennillo sentenno l’abbajatorio de li cane, appe tanta paura, che se schiaffaje drinto a n’arvolo, che trovaje ncafotato, e Nennella deze tanto a ccorrere, che sciuta da lo vosco, se trovaje a na marina, addove essenno smontate cierte corzare a fare legna, nne la zeppoliaro, e lo capo lloro se la portaje a la casa, dove la mogliere essennole morta de frisco na figliola, se la pegliaro pe ffiglia. Ma tornanno a Nennillo, che ncaforchiatose drinto a chella scorza d’arvolo, era ntorniato da cane, che facevano n’alluccare da stordire, tanto che facenno vedere lo Prencepe, che cosa fosse, e trovato sto bello figliulo, che non seppe dire chi fosse lo patre, e la mamma, tanto era peccerillo, lo fece mettere ncoppa na sarma de no cacciatore, e portatosillo a lo palazzo riale, lo fece crescere co granne delegenzia, e mmezzare vertoluso, e fra l’autre cose lo fece mparare da Scarco, tanto che non passaro tre, o quatto anne, che deventaje accossì bravo dell’arte soja, che sparteva a capillo. Fra chisto tiempo essennose scopierto ca lo corzaro, che teneva Nennella era latro de maro, lo vozero pigliare presone, ma isso, che aveva ammice li scrivane, e le tteneva abboccate, se la folaje co tutta la casa, e fuorze fo jostizia de lo Cielo, che chi aveva fatto le mbroglie a maro, a maro nne pagasse la pena, e perzò nvarcatose ncoppa na varca sottile, comme fu ’n miezo maro, venne tale refola de viento, e tale zirria d’onne, che se revotaje la varca, e fecero tutte lo papariello; schitto, Nennella, che n’avea corpa ne li latrocinie suoje, comme avea la mogliere, e li figlie, scappaje sto riseco, pocca se trovaje a sto medesemo tiempo ntuorno la varca no gran pesce fatato, lo quale aprenno no gran sfonnerio de cannarone, se la gliottette; ma quanno la figliola se credette d’avere scomputo li juorne, tanno trovaje cosa da strasecolare drinto lo ventre de sto Pesce, ca nc’erano campagne bellisseme, giardine de spanto, na casa de Segnore co tutte le commedetà, dove stette da Prencepessa; da lo quale Pesce fu portata de zeppa, e de pesole a no scuoglio, dove essenno la maggiore afa de la state, e la cchiù granne carcarella, era venuto lo Prencepe a pigliare frisco; e mentre s’apparecchiava no banchetto terribile, Nennillo s’era puosto a no gaifo de lo Palazzo ncoppa sto scuoglio ad affilare cierte cortielle, delettannose assaje de l’affizio sujo pe farese nore, lo quale visto da Nennella pe lo cannarone de lo Pesce, sparaje na voce ’n cupo; frate mio, frate, li cortielle so ammolate, le tavole apparecchiate, ed a mme la vita ncresce, senza te drinto a sto pesce. Nennillo la primma vota non mese mente a sta voce: Ma lo Prencepe, che steva a n’autra loggia, votatose a sto lamiento, vedde lo pesce, e sentette n’autra vota le stesse parole; pe la quale cosa restaje fora de se stisso de lo stopore, e mmannato na mano de serveture a bedere si co quarche muodo potessero gabbare lo Pesce a tirarelo ’n terra, finalemente sentenno leprecare sempre chillo medesemo, (frate mio, frate mio), demmannaje ad uno ped uno à tutte le gente soje, chi avesse quarche sore sperduta, e rresponnenno Nennillo, ca se jeva allecordanno comme no suonno, che quanno isso lo trovaje a lo vosco, aveva na sore, che non ne seppe cchiù nova. Lo Prencepe disse, che s’accostasse a lo pesce, e bedesse, che cosa fosse, fuorze stà ventura era stipata ped isso. E Nennillo accostatose a lo pesce, chillo cacciato la capo ncoppa a lo scuoglio, ed aprenno seje parme de canna, ne scette Nennella accossì bella, che parze no ntermedio appunto de na Ninfa pe ncanto de quarche Mago sciuta da chillo anemale, e demmannato da lo Rè comme passava sto fatto, le jeze azzennanno quarche parte de li travaglie loro, e l’odio de la matreja; ma non se sapenno allecordare de lo nomme de lo patre, nè de la casa lloro, lo Rrè fece jettare banno, che chi avesse perduto duje figlie chiammate Nennillo, e Nennella drinto a no vosco, fosse venuto a lo Palazzo riale, ca n’averria avuto bona nova. Jannuccio, che nne steva sempre co lo core nigro, e sconzolato, credenno che fossero state manciate da lupe, corze co n’allegrezza granne a trovare lo Prencepe, decenno, ch’isso avea perduto sti figlie. E contato la storia comme fosse stato sforzato de portarele a lo vosco, lo Prencepe le fece na bona nfroata, chiammannolo vervecone da poco; lo quale s’avea fatto mettere lo cauce ncanna da na femmenella, reddocennose a mmannare spierto doje gioje comm’erano li figlie suoje. Ma dapò che l’appe rotta la capo co ste parole, nce mese lo nchiastro de la consolazione, facennole vedere li figlie, che non se saziaje pe mez’ora d’abbracciare, e basare, e lo Prencepe fattole levare lo capo-purpo da cuollo, lo fece vestire da gentelommo; e fatto chiammare la mogliere de Jannuccio le fece vedere chelle doje puche d’oro, decennole, che mmeritarria chi le facesse male, e le mmettesse a pericolo de morte? ed essa respose: io pe mme la metterria drinto na votte chiusa, e la vrocciolarria pe na montagna. Và ca l’aje, disse lo Prencepe: la crapa ha portato le ccorna contro se stessa; ora susso pocca tu t’aje fatta la sentenza, tu la paga, avenno portato tant’odio a sti belle figliastre; e accossì dette ordene, che se secotasse la settenzia data da essa stessa, e trovato no gentelommo ricco ricco vassallo sujo, le dette Nennella pe mmogliere, e la figlia de n’autro semmele a lo frate, dannole ntrate vastante da campare loro, e lo patre, che n’appero abbesuogno de nesciuno a lo munno, e la matreja nfasciata da na votte, sfasciaje la vita, gridando sempre pe lo mafaro, mentre appe spireto,

_Trica malanno, e guajo a chi l’aspetta._ _Po nne vene una bona, e paga tutte._

LE TRE CETRE.

TRATTENEMIENTO IX De la Jornata V.

_Cenzullo non vole mogliere, ma tagliatose no dito sopra na recotta, la desidera de petena janca, e rrossa, comme a chella, che ha fatta de recotta, e sango, e pe chesto cammina pellegrino pe lo munno, ed a l’Isole de le tre Ffate ave tre cetre, da lo taglio d’una de le quale acquista na bella fata conforme a lo core sujo, la quale accisa da na schiava, piglia la negra ncagno de la janca, ma scopierto lo trademiento, la schiava è ffatta morire, e la Fata tornata viva deventa Regina._

_Non se pò dicere quanto gustaje lo Cunto de Paola a tutte le ccammarate; ma devenno parlare Ciommetella, ed avutone lo zinno, accossì dicette._

Disse veramente bravo chillo ommo saccente, non dire quanto faje, nè fare quanto puoje, perchè l’uno, e l’autro porta pericolo, che non se canosce, roina, che non s’aspetta; comme sentarrite de na certa schiava, parlanno co lleverenzia de la Segnora Prencepessa, la quale pe ffare tutto lo danno possibele a na povera figliola, nne cauzaje tanto male de la costejone, che deventaje essa medesema jodece de lo fallo sujo, e se deze essa stessa la settenzia de la pena, che mmeretava.