Part 15

Era na vota no gran Signore, ch’essennole nata na figlia chiammata Talia, fece venire li sacciente, e nnevine de lo Regno sujo a direle la ventura, li quale dapò varie conziglie concrusero, ca passava gran pericolo pe n’Aresta de lino, pe la quale cosa fece na proibizione, che drinto la casa soja non ce trasesse nè lino, nè ccannavo, o autra cosa simile, pe sfoire sto male scuntro. Ma essenno Talia grannecella, e stanno a la fenestra, vedde passare na vecchia, che ffelava, e perchè n’avea visto maie conocchia, nè ffuso, e piacennole assaje chello rrociolare che faceva, le venne tanta curiosetate, che la fece saglire ncoppa, e pigliato la Rocca ’n mano commenzaje a stennere lo filo. Ma pe desgrazia trasutole n’aresta de lino drinto ll’ogna, cadette morta ’n terra. La quale cosa visto la vecchia, ancora zompa pe le grade a bascio, e lo nigro patre ntiso la desgrazia soccessa, dapò avere pagate co barrile de lagreme sto cato d’asprinio, la pose drinto a lo medesemo palazzo, che steva ’n campagna, seduta a na seggia de velluto sotta a no bardacchino de mbroccato, e chiuse le pporte, abbannonaje pe sempre chillo palazzo, causa de tanto danno sujo, pe scordarese ’n tutto, e pe tutto la mammoria de sta desgrazia. Ma jenno fra certo tiempo no Rrè a ccaccia, e scappatole no Farcone, volaje drinto na fenestra de chella casa, nè tornanno a rechiammo, fece tozzolare la porta, credenno, che nce abetasse gente; ma dapò tozzolato no buono piezzo, lo Rrè fatto venire na scala de vennegnatore, voze de perzona scaliare sta Casa, e bedere che cosa nce fosse drinto, e ssagliuto ncoppa, e trasuto pe tutto, restaje na mummia, non trovannoce perzona vevente. All’utemo arrevaje a la cammara dove steva Talia comme ncantata, che bista da lo Rrè, credennose che dormesse, la chiammaje: ma non revenenno pe quanto facesse, e gridasse, e pigliato de caudo de chelle bellezze, portatola de pesole a no lietto, nne couze li frutte d’ammore, e lassatola corcata, se nne tornaje a lo Regno sujo, dove non se allecordaje pe no piezzo de chesto, che l’era socciesso, la quale dapò nove mise scarrecaje na cocchia de Criature, uno mascolo, e l’autra femmena, che bedive duje vranchiglie de gioje, li quale covernate da doje Fate, che comparzero a chillo Palazzo, le pposero a le zizze de la Mamma; li quale na vota, volenno zucare, nè ttrovanno li capitielle, l’afferraro lo dito, e tanto zuccaro, che nne tiraro l’aresta: pe la quale cosa parze che se scetasse da no gran suonno, e bistose chelle gioje accanto, le dette zizza, e le tenne care quanto la vita, e mmentre non sapeva che l’era socciesso, trovannose sola sola drinto a chillo Palazzo, e co duje figlie allato, e bedennose portare quarche refrisco de magnare senza vedere la perzona. Lo Rrè allecordato de Talia, pigliato accasione de ire a ccaccia, venne a bederela, e trovato scetata, e co duje Cuccupinte de bellezza, appe no gusto da stordire, e ditto a Talia chi era, e comm’era passato lo fatto, fecero n’amecizia, e na lega granne, e se stette na mano de juorne cod’essa; e lecenziatose co promessa de tornare, e portarenella, jette a lo Regno sujo, nommenanno a tutt’ore Talia, e li figlie; tale che se manciava, aveva Talia ’n vocca, e Sole, e Lluna (che accossì dette nomme a li figlie), si se corcava chiammava l’uno, e l’autre. La Mogliere de lo Rrè, che de la tardanza a la caccia de lo Marito aveva pigliato quarche sospetto, co sso chiammare de Talia, Luna, e Sole, l’era pigliato autro caudo che de Sole, e perzò chiammatose lo Secretario, le decette: Siente ccà, figlio mio, tu staje fra Sciglia, e Scaniglia, tra lo stantaro, e la porta, tra la mazza agghionta, e la grata. Si tu mme dice de chi sta nnammorato Maritemo, io te faccio ricco; e si tu me nascunne sto fatto, io non te faccio trovare nè mmuorto, nè bivo. Lo Compare da na parte scommuoppeto de la paura, da ll’autra scannato da lo nteresse, ch’è na pezza all’uocchie de l’onore, l’appannatora de la jostizia, na sferra cavallo de la fede, le disse de lo ppane pane, e dde lo vino vino. Pe la quale cosa la Regina mannaje lo stisso Secretario a nnomme de lo Rrè a Ttalia, ca voleva vedere li figlie, la quale co n’allegrezza granne mannatole, chillo core de Medea commannaje a lo cuoco, che l’avesse scannate, e fattone deverze menestrelle, e ssaporielle pe ffarele magnare a lo nigro marito. Lo cuoco, ch’era tenneriello de permone, visto sti duje belle pumme d’oro, n’avette compassione, e datole a la mogliere soja, che li nasconnesse, apparecchiaje duje Capriette ’n ciento foggie, e benuto lo Rrè, la Regina co no gusto granne fece venire le vevanne, e mmentre lo Rrè mangiava co no gusto granne, decenno; o comme è buono chesto previta de Lanfusa, o comm’è bravo chest’auto pe ll’arma de vavamo; essa sempre deceva magna, ca de lo ttujo magne: lo Rrè doje, o tre vote non mese arecchie a sto taluorno; all’utemo sentuto ca continuava la museca, respose: Saccio ca magno lo mmio, perchè non ce aje portato niente a sta casa; ed auzatose co ffuria, se nne jette a na villa poco lontano a sfocare la collera. Ma fra sto miezo, non sazia la Regina de quante aveva fatto, chiammato de nuovo lo Secretario, mannaje a chiammare Ttalia, co scusa ca lo Rrè l’aspettava, la quale a la stessa pedata se nne venne desederosa de trovare la luce soja, non sapenno ca l’aspettava lo ffuoco. Ma arrivata nnanze la Regina, essa co na facce de Nerone tutta nviperata, le disse: Singhe la ben-venuta, maddamma Troccola, tu si chella fina pezza, chella mal’erva, che te gaude maritemo; tu si chella cana perra, che mme faje stare co ttanta sbotamiente de chiocca? Va ca si benuta a lo purgaturo, dove te scontarraggio lo danno, che m’aje fatto. Talia sentenno chesto, commenzaje a scusarese, ca non era corpa soia, e ca lo marito aveva pigliato possessione de lo terretorio sujo, quanno essa era addobbiata: ma la Regina non volenno ntennere scuse, fece allommare drinto lo stisso cortiglio de lo Palazzo no gran focarone, e commannaje, che nce l’avessero schiaffata ’n miezo. Talia, che bedde le cose male arrevate, ’ngenocchiatose nnante ad essa, la pregaje, ch’a lo mmanco le desse tanto tiempo, che se spogliasse li vestite ch’aveva ’n cuollo. La Regina non tanto pe mmeserecordia de la negra giovane, quanto pe avanzare chille abete racamate d’oro, e de perne, disse spogliate, ca mme contento, e Ttalia commenzata a spogliarese, ogne piezzo de vestito, che se levava, jettava no strillo, tanto che avennose levato la rrobba, la gonnella, e lo jeppone, comme fu a lo llevarese de lo sottaniello, jettato l’utemo strillo, tanno la strascinavano a fare cennerale pe lo scaudatiello de le brache de Caronte, quanno corze lo Rrè, e ttrovato lo spettacolo, voze sapere tutto lo fatto, e addemmannato de li figlie, sentette ca la stessa mogliere, che le renfacciava lo trademiento recevuto, comme nce l’aveva fatto cannariare; la quale cosa sentuto lo nigro Rrè, datose ’n preda de la desperazione, commenzaje a ddicere. Addonca so stato lo medesemo lupo menaro de le ppecorelle meje; oimè, e pecchè le bene meje non conoscettero le ffontane de lo stisso sango; ah Torca renegata, e che canetudene cosa è stata la toja? và ca tu ne jarraje pe le ttorza, e non mannarraggio ssa facce de tiranno a lo Culiseo pe penetenzia; e accossì decenno, ordenaje, che fosse jettata a lo stisso fuoco allommato pe Ttalia, e nsiemme cod essa lo Secretario, che fu maniglia de sto amaro juoco, e ttessetore de sta marvasa tramma, e bolenno fare lo medesemo de lo Cuoco, che se pensava ch’avesse adacciato li figlie, isso jettatose a li piede de lo Rrè, le disse: Veramente, Signore, non ce vorria autra chiazza morta pe lo servizio, che t’aggio fatto, che na carcara de vrase, non ce vorria autro ajuto de costa, che no palo dereto, no nce vorria autro trattenemiento, che stennerire, ed arronchiare drinto a lo ffuoco, no nce vorria autro avantaggio, ch’essere mmescate le cennere de no Cuoco co chelle de na Regina: ma non è chesta na gran mercè, che aspetto d’averete sarvato li figlie a despietto de chillo fele de cane, che le boleva accidere, pe ttornare a lo cuorpo tujo chello, ch’era parte de lo stisso cuorpo. Lo Rrè, che sentette ste parole, restaje fora de se stisso, e pareva de nzonnarese, nè poteva credere chello, che sentevano l’arecchie soje; pure votatose a lo Cuoco, le disse: Si è lo vero, che m’aje sarvate le figlie, singhe puro securo ca te levarraggio da votare li spite, e te metterraggio a la cocina de sto pietto a botare comme te piace le boglie meje; dannote premmio tale, che te chiammarraje felice a lo munno. Fra tanto che lo Rrè deceva ste pparole, la mogliere de lo Cuoco, che bedde lo besuogno de lo marito, portaje la Luna, e lo Sole nnanze lo patre; lo quale jocanno a lo tre co la mogliere, e li figlie, faceva moliniello de vase, mò coll’uno, e mò coll’autro, e dato no gruosso veveraggio a lo Cuoco, e fattolo gentelommo de la cammara soja, se pigliaje Talia pe mmogliere; la quale gaudette longa vita co lo marito, e co li figlie, canoscenno a tutte botte, ca

_A chi ventura tene,_ _Quanno dorme, perzì chiove lo bene._

LA SAPIA.

TRATTENEMIENTO VI De la Jornata V.

_Sapia, figlia de na gran Baronessa, fa deventare ommo accuorto Cenzullo, che era figlio de no Rrè, che non poteva capere lettere; lo quale pe no boffettone, che le dette Sapia, volennose vennecare, se la pigliaje pe mmogliere, e dapò mille strazie, avutone, senza sapere cosa nesciuna, tre ffiglie, s’accordarono nsieme._

_Fecero na prejezza granne lo Signore Prencepe, e la Prencepessa, quanno veddero arrivare a buon termene le ccose de Talia, che non se credevano maje, che drinto a tanta borrasca trovasse sto puorto, e dato ordene ad Antonella, che sfodarasse lo cunto sujo, essa accossì mese mano._

Tre so le specie de li gnorante a lo munno, che meretarriano l’uno cchiù dell’autro essere puoste a no furno: lo primmo, che non sà: lo secunno, che non vò sapere; lo tierzo, che pretenne de sapere: De la seconna spezia, è lo gnorante de chi v’aggio da parlare, lo quale non volenno farese trasire nchiocca lo ssapere, odia chi nce lo nvezza, e nuovo Nerone, cerca de levarele la via de lo ppane.

Era na vota lo Rrè de Castiello chiuso, ch’aveva no figlio accossì capo-tuosto, che no nc’era remmedio, che bolesse tenere a mmente l’A. B. C. D. e sempre che se le parlava, de lettere, e de mparare, faceva cose de fuoco, che non jovavano strile, nè mmazziate, nè mmenaccie de manera, che lo negrecato patre nne stava abbottato comme a rruospo, e non sapeva che partito pigliare pe scetare lo ngiegno de sto figlio sciaurato, e no lassare lo regno ’n mano a no mammalucco, sapenno essere mpossibile cosa, fare lega la gnoranzia, e dominio de no regno. A sto medesemo tiempo nc’era la fegliola de la Baronessa Cenza, che pe tanto sapere, a lo quale era arrivata ’n tridece anne, n’acquistaje lo nomme de Sapia; le bertolose qualetà de la quale essenno dette a lo Rrè, fece pensiero de dare lo figlio a la Baronessa, che lo facesse nvezzare da la figlia, penzanno, che co la compagnia, e co la competenzia de la fegliola, avesse fatto quarche bene. Puosto addonca lo Prencepe a la casa de la Baronessa, accommenzaje Sapia a nvezzarele la santa-croce; ma vedenno, che le belle parole se le semmenava da dereto, le bone ragiune da n’arecchia le trasevano e da l’autra scevano, le scappaje la mano, e le dette no boffettone; de la quale cosa se pigliaje tanto scuorno Carluccio (che accossì se chiammava lo Prencepe) che chello, che non aveva fatto pe ccarezzielle, fece pe bregogna, e despietto, tanto che ’n poche mise non sulo seppe lejere; ma passaje tanto nnante a la grammatica, che fece pe tutte regole, de la quale cosa appe tanto giubelo lo Patre, che non toccava pede ’n terra; e levato Carluccio da chella casa, le fece studiare l’autre ccose cchiù granne, che deventaje lo cchiù ssaputo de chillo regno: ma fu ttanto la mpressione de lo cuorpo, che le dette Sapia, che veglianno lo teneva nnante l’uocchie, dormenno se lo nzonnava; tanto che fece pensiero de morire, o de vennecarese. Venne fra sto tiempo Sapia a l’ajetà de marite, e lo Prencepe, che aspettava co lo miccio a la serpentina, accasione de fare le bennette soje, disse a lo Patre: Signore mio, io confesso d’avere recevuto l’essere da vuje, e perzò ve tengo n’obreco nfi ncoppa l’astraco: ma a Sapia, che m’ave dato lo buono essere, mme canosco autro tanto obrecato: e perzò non trovanno manera vastante de pagarele tanto debeto, se ve fosse ’n piacere, la vorria pe mmogliere, assecurannote, ca mettarrisse na cota sopra la perzona mia. Lo Rrè, che ntese sta deleberazione de lo figlio, le respose; figlio mio, si bè Sapia non è de chella carata, che doverria essere na mogliere toja, pure co la vertute soja posta a la velanza de lo sango nuostro scenne tanto, che le pò fare sto partito; perzò tu contento, io pagato; e fatto chiammare la Baronessa, fece fare subeto li capitole, e ffatto ffeste competente a no Segnore granne, cercaje ’n grazia a lo Rrè n’appartamiento spartato, dove potesse stare co la mogliere; e lo Rrè pe ccontentarelo, le fece apparecchiare no Palazzo bellissemo separato da lo sujo, dove portatose Sapia, la restrense a na cammara, dannole male da magnare, peo da vevere, e ccotte peo non volenno pagare lo debeto; tanto, che la negra se vedde la cchiù desperata femmena de lo munno: non sapenno la causa de sto male trattamiento a ttiempo, ch’appena era trasuta a la casa: ma venuto voglia a lo Segnore de vedere Sapia, trasette a la cammara soja, e l’addemmannaje comme steva: Menate la mano pe lo stommaco, respose Sapia, ca vedarraje commo pozzo stare, e che cosa t’aggio fatto, pe la quale mme tratte de sta manera comme a ccane? A che fine cercareme pe mmogliere, si mme volive tenere peo de na schiava? a ste parole respose lo Prencepe; non saje tu ca chi fa l’affesa la scrive ’n porvere, e chi la receve ’n marmolo. Allecordate buono, che mme faciste quanno mme mmezzave de lejere, e ssacce ca non ped autro t’aggio voluto pe mmogliere, che pe ssauza de sta vita toja, e mmennecareme de la ngiuria recevuta. Addonca, leprecaje Sapia, arrecoglio male ped avere semmenato bene. S’io te dette, lo ffice ca jiere n’aseno, pe ffarete deventare Sapio. Tu saje ca chi te vole bene te fa chiagnere, e chi te vole male te fa ridere. Lo Prencepe se primmo steva marfuso de lo boffettone, mo se nzorfaje pe bederese renfacciata la gnoranzia soja, e ttanto cchiù, che dove pensava, che Sapia devesse darese ’n corpa de l’arrore, vedde, che ardita comme a gallo le responneva da tuzzo a tuzzo, e perzò votatole le spalle, se nne jette, lassannola peo che non steva: ma tornato fra cierte autre juorne, e ttrovatala co lo stisso appontamiento, se nne partette cchiù ncotenuto de primmo, resoluto de farela cocere co l’acqua soja comme a ppurpo, e ccasticarela co la mazza de la vammace. Fra sto miezo lo Rrè fece cessione de li bene de la vita ncoppa a na colonna de no lietto martoro, e rrestato isso dommeno, e dommenanzio de tutte li state, voze ire a pigliare lo possesso de persona, e mese ’nn ordene cavarcate de gente d’arme, e de Cavaliere degne de la perzona soja, co li quale se mese ’n viaggio. La Baronessa, che, saputo la vita stentata de la Figlia, pe rremmediare prudentemente a sto desordene, aveva fatto na cava pe ssotto lo palazzo de lo Prencepe, pe dove soccorreva de quarche refrisco la poverella Sapia: previsto poche juorne nnante la partuta de lo nuovo Rrè, fece fare carrozze, e livrere de sfuorgio, e bestuta la figlia de tutto punto, co na compagnia de Signore la fece ammarciare pe na strata scortatora, tanto che se trovaje no juorno nnante dove aveva da fermarese lo marito, e pigliato la casa ncontro lo Palazzo, che l’aveva apparecchiato, se mese tutta apparata a la fenestra, dove arrivato lo Rrè, e bisto lo sciore de lo pegnato de le grazie, se nne ncrapicciaje subeto, e fece tanta zappe, che l’appe ’n mano, e lassatala prena, le dette no bello vranchiglio pe mmemoria de l’ammore sujo; ed essennose partuto lo Rè pe girare l’autre Ccitate de lo regno sujo, essa sbignaje a la vota de la casa soja, e ’n capo de nove mise fece no bello figlio mascolo. Ma tornato lo Rrè a lo capo de lo regno sujo, tornaje a bedere Sapia; credenno de trovarela trapassata, ma la vedde la cchiù ffresca de maje, e cchiù che mmaje ostenata a direle, che pe farelo sapio, dov’era n’aseno, le segnaje cinco dita ’n facce. Lo Rrè sdegnato se partette, ed avenno a tornare fore a l’autra viseta, Sapia co lo consiglio de la mamma fece lo medesemo, ch’aveva fatto la primma vota, e godutase lo marito, n’appe na ricca gioja pe portare ’n testa, e nne restaje prena de n’autro figlio mascolo, che tornata a la casa, comme fu ammaturo lo tiempo, scarrecaje, e ssoccessole la terza vota sto chiajeto, le fu dato da lo Rrè na grossa catena d’oro, e prete preziose, e la lassaje graveta de na figlia femmena: la quale scie a ppuorto a lo tiempo debeto, e benuto lo Rrè da fore, trovaje, che la Baronessa avenno dato l’adduobbio a la figlia sparze voce, ch’era morta, e mmannatala ad atterrare, destramente la fece pigliare da la fossa, e annasconnere drinto la casa. Pe la quale cosa lo Rrè co na festa granne trattaje n’autro accasamiento co na perzona granne, la quale portatala a lo Palazzo riale, mentre se facevano feste da stordire, comparze Sapia a la sala, co li tre figlie, ch’erano tre gioje, e ghiettatase a li piede de lo Rrè, cercaje justitia, che non dovesse levare lo regno a sti figliule, ch’erano lo sango sujo. Lo Rrè pe no piezzo stette comme a n’ommo, che se nzonna. All’utemo vedenno, ca lo ssapere de Sapia arrivava a le Stelle, e bisto appresentarese quanno manco se lo credeva tre ppontelle de la vecchiezza soja, se le ntennerette lo core, e dato chella Segnora pe mmogliere a lo frate co gruosso stato, se pigliaje Sapia, facenno canoscere a la gente de lo Munno,

_Ca l’ommo Sapio dommena le Stelle._

LI CINCO FIGLIE.

TRATTENEMIENTO VII De la Jornata V.

_Pacione manna cinco figlie mascole, che hanno a mmezzare quarc’arte pe lo munno, e tornanno tutte co quarche bertù, vanno a lliberare la figlia de no Rrè arrobata da n’Uorco, e dapò varie succiesse contrastanno chi avesse fatto meglio prova da mmeretarela pe mmogliere, lo Rrè la dette a lo patre, comme chianta de tutti sti ramme._

_Fornuto lo cunto d’Antonella, toccanno a Ciulla de parlare, essa acconciatase bona sopra lo sedeturo, e fatto na tenuta mente ntuorno, co na bella grazia accossì decette._

È no gran cellevriello de gatta, chi cova la cennere: chi non cammina, non vede: chi non vede non sape; chi và spierto deventa aspierto; la pratteca fa lo Miedeco; e lo scire de lo pagliariccio fa l’ommo sbegliato, com’io ve farraggio vedere a lo cimiento riale de lo cunto, che ssecota.