Part 12

Era na vota doje sore carnale accossì redotte ’n chiana terra, che tanto campavano quanto sputazzianno da la matina a la sera le ddeta, facevano quarche poco de felato a bennere, ma co tutta sta negra vita, non era possibele, che la palla de la necessità truccanno chella de lo nnore, la mannasse fora: pe la quale cosa lo Cielo, ch’è accossì largo a rremunerare lo bene, comm’è sottile a castecare lo mmale, mese ’n capo a ste ppovere fegliole, che ghiessero a lo mmercato a bennere certe mmatasse de filato, e de chello ppoco che nne cacciassero, n’accattassero na papara; la quale cosa fatto, e pportatase la papara a la casa, le mesero tanto ammore, che la covernavano, comme se le fosse sore carnale, facennola dormire a lo propio lietto. Ma scoppa dì, e fa buono juorno, la bona papara commenzaje a ccacare scute riccie, de manera che a cacata a cacata, se ne nchiero no cascione, e fu tale lo cacatorio, che commenzaro ad auzare capo, e se le vedde lucere lo pilo, de manera, che certe commare lloro trovannose no juorno nziemme a fare parlamiento, decettero fra loro: Aje visto, commare Vasta, Lilla co Llolla, che l’autr’jere non avevano a dove cadere morte, e mo se so repolute de manera, che sforgiano da Segnore? Le bide le ffenestre sempre aparate de galline, e mmuodole de carne che te scioncano ’n facce, che cosa pò essere? o cheste hanno puosto mano a la votta de l’onore, o cheste hanno trovato lo tresoro. Io nne resto na Mummia, respose Vasta, Commare Perna mia, pocca dove cadevano cesse, mo le veo mperteca, e resagliute, che mme pare no suonno. Dicenno cheste cose, ed autre stimolate da la nvidia facettero no pertuso da la casa loro, che rresponneva a le cammare de ste doje fegliole pe fare le guattarelle, e bedere se potessero dare quarche pasto a la curiosetà loro, e ttanto facettero la spia, che na sera quanno lo Sole dà co la sparmata de li ragge ncoppa le banche de lo maro dell’Innia pe dare feria a l’ora de lo juorno, veddero Lilla, e Llolla, che mmesero le llenzola ’n terra, e facennoce saglire la papara, chella accommenzaje a sghizzare frusce de scute, pe la quale cosa le scettero a no medesemo tiempo le bisole dell’uocchie, e la vozza de la canna; e benuta la matina, quanno Apollo co la verga d’oro sconciura l’ombre a rreterarese, venuta Vasta a trovare ste ffegliole, e dapò mille giravote de parlamiento tira, e longa, venne a lo quateno, pregannole a prestarele pe doje ora la papara, pe ffare pigliare ammore a la casa a ccerte ppaparelle, che avevano accattato, e tanto seppe dicere, e pregare, che le nzembrecune de le ddoje sore parte ped essere accossì abbonate, che non sapevano negare, parte pe non mettere a mmalizia la Commare, nce la prestattero co ppatto, che nce la tornasse subeto. Juta la commare a trovare l’autre, stesero subeto lenzola ’n terra, e facettero saglire la papara, che pe pparte de mostrare na zecca a lo fonnamiento, che cognasse scute, nce aperette no connutto de latrina, che lavoraje la biancaria a cheste scure de terra gialla, che l’addore ne jeva pe tutto lo quartiero, comme và de le ppegnate mmaretate la Dommeneca, la quale cosa vedenno, penzaro che covernannola bona, farria sostanza de lapis filosoforo, pe sodisfare la voglia loro. E accossì la cevaro tanto, che l’arrevava ncanna, e postola ncoppa a n’autro lenzulo nietto, se primma la papara se mostraje lubreca, mo se scoperse a besentierio, che la ndegestione fece la parte soja. Pe la quale cosa le commare sdegnate vennero ntanta collera, che ttuorto lo cuollo a la papera la jetaro pe la fenestra a na stratella, che non spontava, addove se jettava la monnezza. Ma comme voze la sciorte, che dove manco te cride fa nascere la fava, passaje pe cchella parte no figlio de Rrè, che ghieva a ccaccia, dove se le moppe lo cuorpo de manera, che dato a tenere la spata, e lo cavallo a no servetore, trasette a chillo vicuozzolo a scarrecare lo ventre, e fatto ch’appe lo servizio, non trovannose carta a la saccocciola pe stojarese, visto chella papara accisa de frisco, se ne servette pe pezza. Ma la papara, che n’era morta, s’afferraje de manera co lo pizzo a le pporpe de lo nigro Prencepe, che commenzanno a gridare nce corzero tutte li serveture, e bolennola sciccare da la carne, non fu possibile, che s’era attaccata comme na Sarmace de penne a n’Ermafrodito de pile. De sciorte, che lo Prencepe non potenno resistere de lo dolore, e bedenno le ffatiche de li serveture jettate a lo viento, se fece portare ’n braccia a lo palazzo Riale, dove fatto chiammare tutte li miedece, e conferitese sopra la facce de lo luoco, fecero tutte le pprove lloro pe rremediare a sto azzedente, mettenno onziune, adopranno tenaglie, jettannoce porvere. Ma vista che la papera era na zecca, che non se scrastava pe argiento vivo, na sangozuca, che non se levava pe acito, fece subeto jettare no banno, che chi se confidasse levarele chillo frusciamiento de tafanario, s’era ommo l’averria dato miezo Regno, e si era femmena l’averria pigliata pe mmogliere. Lloco te vediste la gente a mmorra a ddarence de naso: ma quanto chiù nce facevano remmedio, cchiù la papera stregneva, e ttenagliava lo scuro Prencepe, che pareva, che se fossero confarfate tutte le rrezette de Galeno, l’Aforisme de Ippocreto, e li remmedie de Mesoe contra la posteriore de Ristotele pe ttrommiento de chillo sbentorato. Ma comme voze la sciorte fra tante e tante, che bennero a fare sta prova, nce arrivaje Lolla la cchiù peccerella de le doje sore, la quale comme vedde la papara, la canoscette, e gridaje, Ntrofatella mia, ntrofatella: la papara, che ssentette la voce de chella, che le voleva bene, lassaje subeto la presa, e le corze ’n sino, facennole tante carizze, e basannola, no se curanno de cagnare lo C. de lo Prencepe, co na vocca de na Villana. Lo Prencepe, che bedde sta maraviglia, voze sapere comme cammenava lo fatto, e benuto ’n conziderazione de la burla de le Ccommare, le ffece frustare pe la terra, e mmannare ’nn asilio, e pigliatose Lolla pe mmogliere co la papara ’n dote, che ccacava ciento tresore, dette n’autro marito ricco ricco a Lilla, e stettero li cchiù conzolate de lo Munno a ddespietto de le Ccommare, le quale volennole chiudere na strata a le recchezze, che le mannaje lo cielo, le aperzero n’autra ad essere Regina, conoscenno a la fine,

_Ch’ogn’impiedeco è spisso jovamiento._

LI MISE.

TRATTENEMIENTO II De la Jornata V.

_Cianne, e Llise fratielle, l’uno ricco, e l’autro povero. Lise ped essere povero, e niente ajutato da lo frate ricco, se parte, e ncontra tale fortuna, che se fa straricco: l’autro cerca pe ’nvidia la medesema sciorte, e le resce accossì ccontraria, che non se po scazzecare da na desgrazia granne, senza l’ajuto dell’autro frate._

_Lo riso, che mmattette a chella scommerzione pe la desgrazia de lo Prencepe, fu accossì spotestato, che l’avette a scennere la polletra ad ogn’uno de lloro, e se nne sarriano jute contrapuntianno rise pe fi a la rosa, se Cecca non avesse fatto signo, che era all’ordene pe sbufarare lo sujo, pe la quale cosa fatto no sequestro a le bocche de tutte, accommenzaje a dicere._

È Mutto de scrivere a llettere de catafarco; che maje lo stare zitto fece nozemiento a nnesciuno. Ma la lengua de certe mmozzecutole, che non sanno maje dicere bene, e sempre tagliano, e ccoseno, e sempre fuorfechejanno, e pogneno, non te curare, ca nne cauzano bene de la costejone, ca a lo scotolare de li sacche sempre s’è bisto, e se vede ca dove lo dire bene s’acquista amore, ed utile, lo ddire male se guadagna nemicizia, e rroina, e ssentite de che mmanera, ca mme darrite no cantaro de ragione.

Dice, ch’era na vota duje frate carnale, Cianne, che steva commodo commodo comme a no Conte, e Llise, che n’aveva manco la vita, ma quanto l’uno era povero de fortuna, tanto l’autro era meschino d’animo, che non se sarria auzato de cacare pe rrefrescarese lo spirito, tanto che lo povero Lise desperato lassaje la patria, e se la dette a cammenare lo munno, e tanto cammenaje, che na sera arrivaje co na jornata pessema a na taverna, dove trovaje dudece giuvene sedute ’ntuorno a lo ffuoco, li quali visto lo nigro Lise tutto aggrancato, che era adesa tisico de lo friddo sì pe la stascione, che era forte, comme pe li vestite, ch’erano lasche, lo commetaro a ssedere a canto a lo focolaro, lo quale azzettato lo ’nvito, ca nn’aveva no granne abbesuogno, se mese a scarfare, e scarfannose fu addemandato da uno de chille giuvene, ch’era tutto ngrifato co na cera brosca da fare sorrejere; Che te pare pajesano de sto tiempo? che mme vo parere? disse Lise, mme pare, ca tutte le mise dell’anno fanno lo debeto lloro: ma nuje, che non sapimmo chello, che addemannammo, volimmo dare legge a lo Cielo, e ddesederanno le ccose a mmuodo nuostro, non pescammo troppo a ffunno se sia bene, o male, utele, o danno, chello, che nce vene ’n crapiccio, tanto che lo Vierno, quanno chiove, vorriamo lo Sole Lione, e lo mese d’Agusto le scarrecate de le nnuvole, non penzanno, che se chesto fosse, le stasciune jarriano a ccapo culo, le semmiente se perderriano, le rraccovote jarriano a mmitto, le cuorpe se ntamarriano, e la natura jarria a gamme ’n cuollo, perrò lassammo fare a lo cielo lo curzo sujo, ca perzò ha fatto l’arvole, pe rremmediare co llegna a lo regore de lo Vierno, e co le frunne a lo caudo de la Stata. Tu parle da Sanzone, disse chillo giovene, ma non me puoje già negare, che chisto mese de Marzo, dove simmo, non sia troppo mpertenente co ttante jelate, e cchioppete, neve, e grannole, viente, refole, neglie, e ttempeste, ed autre fruscole, che nce fa venire ’n fastidio la vita. Tu dice lo mmale de sso povero Mese, respose Lise, ma non parle già dell’utele, che nce porta: pocca isso dà principio, co lo mmettere nnanze la Primmavera, a la ngenerazione de le ccose, e quanno maje autro isso è ccausa, che lo Sole prova la felecetà de lo tiempo presente, co starelo trasire a la casa de lo montone. Appe gran gusto sto giovene de le pparole de Lise, perchè appunto era lo stisso mese de Marzo, che coll’autre unnece fratielle era capetato a chella Taverna, e pe rremonerare la bontà de Lise, che non avenno saputo dire male de no Mese tanto tristo, che mmanco li Pasture lo vonno mentoare, le deze na bella cascettella, decennole: Pigliate chesta, vide tutto chello, che t’abbesogna, e cerca puro, che rraprenno sta casciolella, te lo ttrovarraje nnante. Liso co pparole granne de sommessione rengraziaje chillo giovene, e puostose la cascetta a ccapo comme coscino, se mese a ddormire, e non tanto priesto lo Sole co li pennielle de li ragge venne a rretoccare de chiaro l’ombre de la notte, che lecenziatose da chille giuvane, se mese ’n cammino, ma non fu cinquanta passe allontanato da la taverna, che rraprenno la cascetella, disse: O bene mio, e non porria avere na lettica nforrata de friso, co no poco de fuoco drinto, e cammenasse caudo caudo pe drinto ste nneve? Non accossì priesto appe scomputo de dire, che comparze na lettica co li lettechiere, che pigliatolo pesole, e puostolo drinto, isso le decette, che cammenassero verzo la casa soja; e comme fu l’ora de menare li guoffole, aperta la casciolella, disse: Venga rrobba da magnare, e lloco te vediste sbrommare lo bene de lo Cielo, e fu tale lo banchetto, che nce potevano manciare diece Rrì de corona. Arrivate na sera a no vosco, che non deva pratteca a lo Sole pe benire da luoche sospette, aperta la cascettella, e decenno a sto bello luoco, dove sto sciummo fa contrapunte ncoppa le pprete, pe accompagnare lo canto fermo de li viente frische, io vorria reposare sta notte; lloco te vediste armare na travacca de scarlato fino sotto a na tenna de ncerato, co mmatarazze de penne, coperta de Spagna, e llenzola, sciosciale, ca vola; e demannanno da manciare, subeto fu puosto ’n ordene no repuosto d’argentaria a facce de no Prencepe, ed aparata na tavola sotto n’autra tenna de vevanne, che l’addore jeva ciento miglia. Manciato che appe, jette a ddormire, e quanno lo Gallo, ch’è spione de lo Sole, avisaje lo patrone, ca l’ombre erano allentate, e stracque, e ca mo era tiempo, comme a ssordato pratteco, de darele a la coda, e farene scafaccio, aperta la cascia, decenno, vorria no bello vestito, perchè ogge m’ha da vedere fratemo, e le vorria fare cannagola, e nnitto ’nfatto se vedde n’abeto de Segnore de velluto ’n quaranta, nigro, co vernille de ciambellotto russo, co no picco granne sopra na nforra de lanetta gialla, che bedive no campo de sciure, e bestutose Lise, se mettette drinto la lettica, e arrivaje a la casa. Cianne, vedennolo venire accossì sforgiuto, e co ttanta commodetate, voze sapere, che ffortuna era stata la soja; lo quale le contaje de li Giuvene, ch’aveva trovato a chella taverna, e de lo presiente, che l’avevano fatto, ma tenne fra li diente lo descurzo passato co chille Giuvene. Cianne non vedde l’ora de lecenziarese da lo frate, decennole, che ghiesse a rreposare, ch’era stracquo, e ssubeto se mese pe le pposte, ed arrivaje a cchella taverna, dove trovato li medeseme Giuvene, se mese a chiacchiariare co lloro, e ffattole chillo giovene la medesema ’nterrogazione, che le pareva de sto Mese de Marzo, isso aprenno de cannarone, commenzaje a dire; O che Dio lo sconfonna sto mese mmarditto, nnemmico de li nfranzesate, odiuso de li pecorare, ’ntrovolamiento de l’umure, scasamiento de li cuorpe. Mese che bolenno annonziare quarche rroina a n’ommo, se le dice; và ca Marzo te n’ha raso: Mese che quanno vuoje dare a uno lo titolo maggiore de presentuso, se le dice: che ccura Marzo? nsomma è no mese, che sarria la fortuna de lo munno, la ventura de la terra, la recchezza dell’uommene, se le fosse sborrato la chiazza de la Squatra de li fratielle. Lo Mese de Marzo, che se sentette fare sta lavata de capo da Cianne, sfarzaje la casa nsino a la matina, co ppenziero de le nzoccare lo bello trascurzo, e bolennose Cianne partire le dette no bello scorriato, decennole: Sempre che te vene desederio de quarcosa, e tu dì: Scorriato dammene ciento, e bedarraje perne nfilate a lo junco. Cianne ringraziato lo Giovane, accomenzaje a toccare de sperone, e non voze fare prova de lo scorriato, finchè n’arrevaje a la casa soja, dove appena puosto lo pede, trasette a na cammara segreta pe cconservare li denare, che sperava da lo scorrejato, a lo quale dicette: Scorriato, dammene ciento, e lo scorriato se non ce ne deze, di che torna pe lo riesto, facenno contrapunto de compositore de museca pe le gamme, e pe la facce de manera che a li strille corze Lise, e bedenno ca lo scorriato non se poteva tenere, ca faceva comme a ccavallo scapolo, aperze la cascettella, e lo facette fermare; e ddommannato Cianne, che l’era socciesso, ntese la storia, e le decette, che non se lamentasse d’autro, che de se medesemo, che se aveva causato da se stisso lo male, comme a tturdo, e che aveva fatto comme a lo cammelo, che desideranno avere le ccorna, perdette l’aurecchie, ma che nvezzasse n’autra vota a ttenere frieno a la lengua, la quale era stata la chiava, che l’aveva apierto lo magazeno de sta desgrazia; perchè se isso diceva bene de chille Giuvene, correva fuorze la medesema Fortuna, tanto cchiù ca lo ddire bene è na mercanzia, che non costa niente, e sole avanzare guadagno, che non se crede. All’utemo lo conzolaje, che non cercasse chiù commodetà de chello, che l’aveva dato lo Cielo, ca la cascetta soja vastava a nchire a scafaccio trenta case d’avare, e ca isso sarria stato patrone de tutto lo bene sujo, perchè a l’ommo liberale lo Cielo è ttesauriero, e ca si be n’autro frate l’averria nsavuorio pe la canetate, che l’aveva usate nne le mmeserie soje, tutta vota penzava ca la meschenezza soja era stato lo viento prospero, che l’aveva portato a sto puorto, e perzò nce ne voleva avere grazia, ed aveva anemo de recanoscere sto piacere. Sentute ste ccose Cianne, le cercaje perdonanzia de lo nzamoramiento passato, e fatto na lega de poteca, se gaudettero nziemme la bona ventura, e dall’ora nnante Cianne disse bene d’ogni cosa, pe ttrista che ffosse,

_Ca lo cane scaudato d’acqua cauda,_ _Ha paura perzì de l’acqua fredda._

PINTO SMAUTO.

TRATTENEMIENTO III De la Jornata V.

_Betta recusa de volere marito: all’utemo se ne mpasta uno de mano soja, ed essennole arrobbato da na Regina, dapò mille travaglie lo trova, e co grann’arte recuperatolo, se lo reporta a la casa._

_Avenno scomputo lo cunto Cecca, che piacquette stremamente a ttutte, Meneca, che steva a ccavalletto pe sparare lo sujo, visto che stevano co l’aurecchie appezzute pe ssentire, accossì parlaje._

Fu sempre cchiù defficele all’ommo lo conservare l’acquistato, che l’acquistare de nuovo, perchè nell’uno concorre la fortuna, che spisse vote ajuta le ’njostizie, ma nell’autro nce vole sinno: perrò se vede pe lo cchiù, perzona, che n’ha trascurzo, saglire dov’è lo bene. Ma pe ccarestia de nciegno vrocciolarene a bascio, comme da lo cunto, che ve dirraggio, si site comprennuoteche, porrite chiaramente vedere.