IX.
DECREE OF PIUS V, JUNE 6, 1566.
(Bulario de la Orden de Santiago, Libro III, fol. 91.--Archivo historico nacional de Madrid).
(See p. 132).
Die Jovis sexta mensis Junii, 1566, Sanctissimus in Christo pater D. N. D. Pius divina providentia Pius Quintus, in Congregatione officii Sanctæ Ro. universalis Inquisitionis, in throno majestatis suæ sedens, unacum illustrissimis et reverendissimis dominis Dominis Cardinalibus Inquisitoribus Generalibus, statuit, decrevit, ordinavit et mandavit ut negotia fidei omnibus et singulis aliis præferantur, cum fides sit substantia et fundamentum Christianæ religionis. Idcirco omnibus et singulis almæ Urbis ejusque districtus Gubernatori, Senatori, Vicario, Cameræ Apostolicæ auditoribus quibuscunque, Legatis, Vicelegatis, Gubernatoribus Provinciarum et Terrarum suæ Sanctitati et Sanctæ Romanæ Ecclesiæ mediate vel immediate subjectarum ac eorum locatenentibus, officialibus, barissellis aliisque ministris, necnon aliis locorum ordinariis cæterisque magistratibus, officialibus ac cujusvis conditionis et status hominibus in omnibus et singulis terris, oppidis, civitatibus ac in tota Republica Christiana existentibus, sub excommunicationis latæ sententiæ ac indignationis suæ Sanctitatis aliisque arbitrio suæ Sanctitatis ac illustriss, et reverendiss. D. D. Cardinalium Inquisitorum Generalium imponendis et exequendis pœnis, ut eisdem Cardinalibus Inquisitoribus hujusmodi ac eorum præceptis et mandatis in quibuscunque officium sanctæ Inquisitionis hujusmodi concernentibus pareant et obediant. Reges vero, Duces, Comites, Barones et quosvis alios Principes sæculares in Dei nomine rogavit ut eisdem Cardinalibus Inquisitoribus eorumque officialibus faveant auxiliumque præbeant, a suis magnatibus subditis auxilium præberi faciant in negotiis ad dictum officium spectantibus, necnon carceratos quoscunque pro quibusvis delictis et debitis etiam atrocibus, apud dictum Inquisitionis officium quomodolibet delatos vel denunciatos, suspensa aliorum criminum inferiorum cognitione, ad eosdem Cardinales vel Inquisitionis carceres, ibidemque ad criminis hæresis totaliter cognitionem et expeditionem retinendos, postea ad eosdem officiales pro aliorum criminum cognitione remittendos, sine mora transmittant. Instante magnifico Domino Pedro Belo procuratore fiscali officii Sanctæ Romanæ Universalis Inquisitionis.